जैताणे गाव ११तारखेपर्यंत बंद

प्राथमिक आरोग्य केंद्र व ग्रामीण रुग्णालय, जैताणेच्या संयुक्त यंत्रणेने ठेवलेल्या कोरोना तपासणी शिबिरात १५२ पैकी ५७ रुग्ण पॉझिटिव्ह आढळले. आमदार मंजुळा गावित, तुळशीराम गावित, प्रांताधिकारी भीमराव दराडे, तहसीलदार विनायक थविल, गटविकास अधिकारी सूर्यवंशी, तालुका वैद्यकीय अधिकार डॉक्टर तडवी, अजित बागुल आदींनी जैताणे येथे भेट देऊन तातडीने पावले उचलण्याच्या सूचना जैताणे वैद्यकीय अधिकारी, ग्रामसेवक व सरपंच आदींना दिल्या होत्या. त्यानुसार ५ रोजी जैताणे ग्रामसेवक अनिल राठोड, सरपंच कविता मुजगे, पंचायत समिती सदस्य अशोक मुजगे, गटनेते बाजीराव पगारे, गणेश न्याहलदे, श्याम भलकारे, उपसरपंच कविता शेवाळे व सर्व ग्रामपंचायत सदस्य यांनी तातडीने बैठक घेऊन कोरोनाचा प्रसार रोखण्यासाठी प्रतिबंधात्मक उपाययोजना आखणीसंदर्भात बैठक घेतली. या बैठकीत सर्वानुमते कडक पावले उचलण्यावर एकमत झाले. बैठकीत ठरल्याप्रमाणे गावातील वैद्यकीय आस्थापना सुरळीत सुरू राहतील. इतर अत्यावश्यक सेवा किराणा, कृषी सेवा केन्द्र, भाजीपाला आदी पूर्णपणे बंद राहणार आहेत. दूध विक्री घरपोच सकाळी ५ ते ७ व सायंकाळी ६ ते ८ या निर्धारित वेळेतच करता येईल. एस. टी. वाहतूक वगळता इतर वाहतुकीवरही निर्बंध असतील. आठवडे बाजार शासनादेश येईपर्यंत स्थगित करण्यात आला आहे. दुकाने उघडल्यास ५ हजार रुपये दंड व सील करण्याची दंडात्मक कारवाई करण्यात येईल. (वैद्यकीय कारणाशिवाय) विनाकारण भटकंती करणाऱ्यास १ हजार प्रतिव्यक्ती दंड, विनामास्क आढळल्यास २०० रुपये दंड आकारण्यात येणार आहे. अंत्यविधीस २० जणांची कमाल मर्यादा तसेच विवाह सोहळ्यास तहसीलदारांची परवानगी आवश्यक असून, ५० जणांच्या उपस्थितीची मर्यादा घालण्यात आली आहे. यासोबतच सर्व शाळा, महाविद्यालये, खासगी क्लासेस बंद ठेवण्याचे आवाहन करण्यात आले आहे.

बैठकीनंतर झालेल्या निर्णयाची सूचना रिक्षा फिरवून ध्वनीपेक्षकाद्वारे ग्रामस्थांना देण्यात आल्या आहेत.