भूमिलेख अधिकाऱ्यासह १३ जणांवर गुन्हा दाखल

मे़ शहा कन्स्ट्रक्शनचा शहरातील वरवाडे भागात सिटी सर्व्हे नंबर ३५०७ ब व सिटी सर्व्हे नंबर ३५०३ हे दुय्यम निबंधक यांच्याकडील दस्त क्रमांक १५३७/२००३ व १५३८/२००३ अन्वये विकसन करारनामा व कधीही न रद्द होणारे जनरल मुखत्यारपत्राद्वारे हेमलता भूपेंद्रकुमार शहा-जैन (रा.जैन गल्ली शिरपूर) यांचेकडून सुरुवातीस ६९ लाख रुपयात ठरविण्यात आला होता. परंतु सदर सर्व्हेमध्ये काही जागा राखीव असल्याने नव्याने बोलणी होवून ४६ लाख ३१ हजार ५०० रुपयात निश्चित करण्यात आला़. त्याबाबत पुरवणी विकसन करारनाना २७ सप्टेंबर २००४ रोजी दुय्यम निबंधक कार्यालयात दस्त नोंदविण्यात आला. हेमलता जैन यांनी त्यांचे दोन्ही मिळकतीत असलेले सर्व हक्क अधिकार करून दिले आहेत. त्यामुळे हेमलता जैन यांच्या सदर मिळकतीत कुठलाही हक्क, अधिकार राहिलेला नव्हता.

दरम्यान, सिटी सर्व्हे नंबर ३५०७ ब या मिळकतीवर भाविका कॉम्प्लेक्स या नावाची इमारत बांधून सर्व सदनिका या त्रयस्थ व्यक्तींना विक्री केलेल्या आहेत. त्याबाबत दुय्यम निबंधक कार्यालयात नोंद करण्यात आली. नोव्हेंबर २०२० मध्ये भाविका कॉम्लेक्सच्या पश्चिमेकडील रस्त्यावर काही जणांनी रातोरात पत्र्याचे शेड उभारले. शेड उभारण्याचे काम सुरू असतांना त्यावेळी तेथे उपस्थित राहुल शालिक देवरे (रा. वरवा), सुनील देवीदास माळी (रा़. वाघाडी), रूपेश अर्जुन माळी (रा़.वरवाडे) यांनी ही जागा ही हेमलता जैन यांच्याकडून खरेदी केल्याचे सांगितले. मात्र सिटी सर्व्हे कार्यालयात जाऊन चौकशी केली असता ९ ॲाक्टोबर २०२० रोजी हेमलता जैन यांनी सि.स.नं.३५०७/ब यापैकी पश्चिमेकडील ३८० चौ.मी. एवढी जागा राहुल देवरे, सुनील माळी, रूपेश माळी या तिघांना बेकायदेशीरपणे तसेच शिरपूर येथील भूमिलेख कार्यालयातील तत्कालीन अधिकारी/कर्मचारी यांना हाताशी धरून मूळ दस्तऐवजामध्ये खाडाखोड/फेरफार करून अस्तित्वात नसलेली बखळ जागा दाखवून विक्रीचा व्यवहार केला. तसेच भाविका कॉम्प्लेक्समधील दुसऱ्या मजल्यावरील एका सदनिकेवर ३ लाख ४५ हजार रुपयांचा बोझा लावलेला असून देखील भूषण नंदलाल चौधरी (रा़. अमळनेर) यास विक्री केलेला आहे. तसेच सि.स.नं ३५०३ मधील तिनही मोकळे प्लॉट भटू माळी, राकेश अग्रवाल व लाखन भील यांचेशी संगनमत करून साक्षीदार गिरीश विजय पाटील, आनंदा जगन्नाथ कोळी यांच्या समक्ष खरेदी विक्रीचा व्यवहार केलेला आहे़

ही जागा, प्लॉट, बांधकाम विक्रीचा सर्व अधिकार हे शहा कन्स्ट्रक्शन कंपनी पुणे यांना दिलेला असतानादेखील संशयितांनी केलेल्या कराराचा भंग करून फिर्यादीसह शासनाची फसवणूक केली आहे.

याबाबत शहा कन्स्ट्रक्शन कंपनीचे मालक धर्मेश दीपक शहा (रा.पुणे) यांनी दिलेल्या फिर्यादीवरून संशयित आरोपी हेमलता भूपेंद्रकुमार जैन-शहा, भूपेंद्र अमृतलाल शहा (रा़. जैन गल्ली), मानसी राकेश अग्रवाल,राकेश अशोक अग्रवाल (रा.सराफ बाजार), राहुल देवरे, रूपेश माळी, भूषण चौधरी, सुनील माळी, भटू भिवसन माळी (रा.वरवाडे शिरपूर), रा.सराफ बाजार, लखन मख्खन भिल रा.रामसिंग नगर, गिरीश विजय पाटील रा.वरवाडे, आनंदा कोळी, तत्कालीन अधिकारी भूमि अभिलेख कार्यालय शिरपूर अशा १३ जणांविरोधात शिरपूर पोलिसात भादंवि कलम ४२०, ४०६, ४६६, ४६८, ४६९, ४७०, ४७१, १२० ब ३४ प्रमाणे गुन्हा नोंदविण्यात आला आहे.