वीज कनेक्शन कट केल्याच्या रागातून लाईनमनला मारहाण

दोघांवर शिरपूर शहर पोलीस ठाण्यात गुन्हा

शिरपूर : वीज बिल थकबाकीमुळे वीज कनेक्शन खंडीत करण्यासाठी गेलेल्या लाईनमनला शिरपूर शहरात मारहाण झाल्याची घटना घडलेली आहे. या प्रकरणी दोघांवर शिरपूर शहर पोलीस ठाण्यात गुन्हा दाखल करण्यात आलेला आहे.

शिरपूर शहरात शुक्रवारी वीज वितरण कंपनीचे कर्मचारी युवराज विनायक सोनवणे, प्रेमसिंग पंडित बंजारा व किसन दुधा पावरा हे शहरातील आदर्श नगर भागात वीज बिल वसुली साठी गेले होते. यावेळी त्यांना त्यांचे अधिकारी हितेंद्र बढे यांनी वीज बिल थकबाकी वसूल करून आणावी. तसेच जे वीज बिल भरणार नाहीत त्यांची वीज खंडित करावी असे त्यांना आदेश दिलेले होते. यावरून त्यांनी शहरातील वीज बिल वसुली करण्यासाठी ते आदर्श नगर येथे गेले होते. ज्यांनी विज बिल भरले नाही त्यांचे वीज कनेक्शन कर्मचारी खंडित करत होते.

शुक्रवारी दुपारी एक वाजेच्या दरम्यान विठू वजीर लोहार यांचे नातू इरफान फारुख लोहार व जाबीद फारूख लोहार हे तेथे आले. त्यांनी सोनवणे यांना जाब विचारला. यावेळी सोनवणे यांनी आम्हाला कार्यालयातून वीज वसुली करण्याचे आदेश आहेत. तसेच आपल्याकडे असणारे ११०७० रुपये वीजबील आपण भरणा केलेला नाही. म्हणून तुमचे वीज कनेक्शन खंडित करण्यात आलेले आहे. असे सांगून ते पुढे जावू लागले. मात्र याच वेळी इरफान व जाबीद यांनी सोनवणे यांना आडवे झाले. त्यांनी सोनवणे यांना वाईट वाईट शिवीगाळ करीत त्यांची कॉलर पकडून धक्काबुक्की करीत मारहाण केली. यावेळी सोनवणे यांना त्यांचे सोबत आलेले बंजारा व पावरा यांनी दोघांच्या तावडीतून सोडवले.

याप्रकरणी युवराज विनायक सोनवणे यांनी दिलेल्या तक्रारीनुसार आदर्श नगर येथे राहणारे इरफान फारूख लोहार व जाबीद फारुख लोहार यांच्या विरोधात शिरपूर शहर पोलीस ठाण्यात भादंवि कलम ३५३, ३२३, ५०४ प्रमाणे गुन्हा दाखल करण्यात आलेला आहे़