आता महिनाभर दाढी-कटिंग घरातच

धुळे : कोरोनाच्या संसर्गात गेल्या वर्षाप्रमाणे यंदादेखील सलूनची दुकाने बंद झाल्याने महिनाभर दाढी-कटिंग घरातच करण्याची वेळ सामान्यांवर आली आहे. सध्या ३० एप्रिलपर्यंत दुकाने बंदच आहेत. त्यानंतरही दुकाने सुरू होतात किंवा नाही याबाबत शंका आहे. कोरोनाचा संसर्ग असाच वाढत राहिला, तर दुकाने बंदच राहतील, अशी शक्यता आहे.

सर्वसामान्यांनी महिने-दोन महिने दाढी-कटिंग केली नाही तरी त्यांचे काही नुकसान होणार नाही; परंतु या मिनी लाॅकडाऊनचा सर्वाधिक फटका सलून व्यावसायिक आणि कामगारांना बसणार आहे.

धुळे शहरात अडीचशेपेक्षा अधिक सलून दुकाने आहेत. कुटुंबातील दोन जणांनी मिळून दुकाने सुरू केली आहेत. शिवाय प्रत्येक दुकानात एक किंवा दोन कामगार आहेत. म्हणजे एका दुकानावर तीन ते चार कुटुंबांचा उदरनिर्वाह अवलंबून आहे. या सर्वांच्या उदरनिर्वाहाचा प्रश्न निर्माण झाला आहे. कोरोना काळात नियमांचे पालन करून दुकाने सुरू करण्यास परवानगी मिळाली होती. त्यानुसार दुकानदार नियमांचे पालन करीत होते. त्यामुळे दुकाने बंद करण्याची गरज नव्हती, असे संघटनांचे मत आहे.

भाडे निघणेही होत आहे अवघड

सलूनच्या व्यवसाय करणाऱ्या अनेकांची दुकाने भाडेतत्त्वाच्या गाळ्यांमध्ये आहेत. दुकाने बंद झाल्याने आता उत्पन्नदेखील बंद झाले आहे. भाडे निघणेही कठीण आहे. दुकानाचे भाडे कसे द्यावे, असा प्रश्न त्यांना सातत्याने सतावत आहे.

गेल्या वर्षी लाॅकडाऊनमध्ये तीन ते चार महिने दुकाने बंद होती. त्यामुळे आर्थिक घडी विसकटली होती. आता कुठेतरी व्यवसाय सुरळीत झाला. पुन्हा दुकाने बंद झाल्याने उपासमारीची वेळ येणार आहे.

-नंदकिशोर सोनवणे, सलून दुकानदार

दाढी-कटिंग हा आमचा पारंपरिक व्यवसाय आहे. हा व्यवसाय आम्ही करू शकतो. दुकाने बंद झाल्याने दुसरा व्यवसाय करणे शक्य नाही. कारण इतर व्यवसायची जाण नाही. आम्ही जगायचे कसे.

-पोपट सूर्यवंशी, सलून दुकानदार

सलूनचा व्यवसाय करून पोट भरण्यासाठी धुळ्यात आलो आहे. भाडेतत्त्वाच्या दुकानात छोट्या भांडवलावर व्यवसाय सुरू केला. गेल्या वर्षी दुकाने बंद झाली तेव्हा कर्जबाजारी झालो. आता पुन्हा तीच वेळ आमच्यावर आली आहे.

-विजय पवार, भाडेतत्त्वाचे दुकान

गेल्या वर्षी जीवनावश्यक वस्तूंसह इतरही व्यवसायांना परवानगी मिळाली होती; परंतु सलून दुकाने सुरू करण्यासाठी संघटनांना संघर्ष करावा लागला. यावेळीदेखील तशीच परिस्थिती आमच्यावर आली आहे. दुकाने बंद झाल्याने दुकानदारांसह कामगारांचादेखील उदरनिर्वाहाचा प्रश्न निर्माण झाला आहे.

-भटू सूर्यवंशी, संघटनेचे पदाधिकारी

शहरात एकूण केश कर्तनालये - २३२

भाडेतत्त्वाच्या दुकानांची संख्या - १३८