चाकूहल्लाप्रकरणी आरोपीला अटक

शहरातील करवंद नाका परिसरात राहणाऱ्या सेवानिवृत्त वैद्यकीय अधिकारी डॉ़.आत्माराम भगवान लोखंडे (६५) यांच्यावर अज्ञाताने गेल्या रविवारी रात्री तीक्ष्ण हत्याराने हल्ला केला होता. हल्ल्यादरम्यान डॉ़लोखंडे यांच्या पत्नी अलका यांनी आरडाओरडा करत लोकांना गोळा केले होते. मात्र, तोपर्यंत हल्लेखोर पसार झालेला होता. या हल्ल्यात डॉ़लोखंडे यांना जबर जखम झालेली होती. त्यांच्या दोन्ही हातांवर, तसेच गळ्यावर हत्याराने वार करण्यात आलेला होता. हल्ल्यात मोठ्या प्रमाणात रक्त सांडले गेले होते. त्यांना गंभीर अवस्थेत उपजिल्हा रुग्णालयात दाखल करण्यात आले होते. अधिक उपचारासाठी त्यांनी धुळे येथे हलविण्यात आले होते़.

उपचारानंतर डॉ़लोखंडे यांनी शिरपूर पोलीस ठाण्यात अज्ञाताविरोधात गुन्हा दाखल केला आहे. डॉ़लोखंडे यांच्या फिर्यादीत म्हटले आहे, घराचा दरवाजा बंद होता. सदर संशयिताने दरवाजा ठोकल्यानंतर लोखंडे यांनी दरवाजा उघडला. दरवाजा उघडून पाहिले असता, संशयित बाहेर लपलेला होता. दरवाजा उघडल्यानंतर तो आत आला. त्याच्या हातात चाकू होता, तसेच त्याने मेहंदी रंगाचे टी शर्ट व काळा मास्क लावलेला होता. त्याने डॉ़लोखंडे यांचे डोके पकडून गळा कापण्याचा प्रयत्न केला. मात्र, लोखंडे यांनी यावेळी प्रतिकार केला. त्यामुळे डॉ़लोखंडे यांच्या चेहऱ्यावर, गळ्यावर, दोन्ही हातांना व छातीला संशयिताने चाकूने वार करून जबर दुखापत केली होती. यावेळी दोघांमध्ये झटापट झाली. यावेळी लोखंडे व संशयित दोन्ही जमिनीवर खाली पडले होते. हा प्रकार त्यांची पत्नी अलका यांच्या लक्षात आला. त्यांनी बाहेरील लोकांना जोरदार आवाज दिला. त्यावेळी गर्दी झाली. संशयित घरातील आतील जिन्याने वर गच्चीवर पळून गेला. त्याच्या मागे गेले असता तो पळून गेला. या संदर्भात लोखंडे यांनी दिलेल्या तक्रारीनुसार अनोळखी हल्लेखोरांवर भादंवि कलम ३०७, ४५२, ४४७, ४४८, ३३८ प्रमाणे गुन्हा दाखल करण्यात आलेला आहे.

या संदर्भात पोलिसांनी एका संशयिताला अटक केलेली आहे. सदर संशयिताने हल्ला केल्याचे कबूल केले आहे. सदर संशयित सूर्यकांत चंद्रकांत कलाल (२०) राहणार रामसिंगनगर शिरपूर असे सांगण्यात आले. सदर संशयितास न्यायालयात हजर केले असता, त्यास न्यायालयाने २ दिवसांची पोलीस कोठडी सुनावली आहे. गुन्ह्याचा तपास पीएसआय किरण बार्हे करीत आहेत.