मागीलवर्षी जिल्ह्यात कोरोनाचा सर्वाधिक प्रादुर्भाव धुळे शहरात झाला होता. रुग्ण आढळण्यासोबतच मृतांची संख्याही जास्त होती. आता रुग्णवाढीच्या दुसऱ्या टप्प्यातही शहरात कोरोनाचा कहर सुरू झाला आहे. शहरातील सर्वच भागात रुग्ण आढळत आहेत. साक्री रोड, देवपूर, वडीभोकर रोड, गोंदूर रोड या भागांचा त्यात समावेश आहे. तरीही बाजारातील गर्दी मात्र कमी होताना दिसून येत नाही. तसेच कोरोनाच्या प्रतिबंधात्मक नियमांचे सर्रासपणे उल्लंघन होत आहे. नागरिकांची बेफिकिरी थांबली तरच कोरोनाचा प्रादुर्भाव नियंत्रणात येऊ शकतो.
चार रुग्णांचा मृत्यू
- १३ ते १९ मार्च या कालावधीत चार रुग्णांचा मृत्यू झाला आहे. खासगी रुग्णालयात उपचार घेताना एकाचा मृत्यू झाला आहे, तर हिरे वैद्यकीय महाविद्यालयात उपचार घेत असताना तीन रुग्ण दगावले. मृतांमध्ये धुळे शहरातील तीन व साक्री येथील एका रुग्णाचा समावेश आहे.
सलग चार दिवस २०० पेक्षा अधिक रुग्ण आढळले -
या आठवडाभरात धुळे शहरात सलग चार दिवस २०० पेक्षा अधिक रुग्ण आढळले आहेत. १५ मार्च रोजी जिल्ह्यातील ५१५ रुग्णांना कोरोनाचा संसर्ग झाला होता. त्यात धुळे शहरातील २५२ रुग्णांचा समावेश होता. तसेच १६ रोजी आढळलेल्या ४५३ रुग्णांमध्ये शहरातील २३८ रुग्णांचा समावेश होता. १७ मार्च रोजी ४०६ अहवाल पॉझिटिव्ह आले होते. त्यात शहरातील २०८ जणांचा समावेश होता, तर १८ रोजी जिल्ह्यातील ४९४ अहवाल पॉझिटिव्ह आले होते. त्यात धुळे शहरातील २९० अहवाल होते. दिवसेंदिवस कोरोनाचा विळखा घट्ट होताना दिसून येत असून, प्रशासनाने कठोर पावले उचलण्याची गरज निर्माण झाली आहे.