नगर परिषदेतही जिल्हा परिषद पॅटर्न

परंडा : येथील नगरपरिषदेच्या विविध विषय समित्यांच्या निवडीतही जिल्हा परिषदेत राबविण्यात आलेल्या ‘सत्ता’ पॅटर्नची झलक दिसत असून, जि. प. प्रमाणेच भाजपाशी तडजोड करून राष्ट्रवादीने बांधकाम व मागासवर्गीय कल्याण ही समिती भाजपाला बहाल केली आहे. गुरुवारी विषय समितीच्या निवडणुका बिनविरोध पार पडल्या. यात सत्ताधारी राष्ट्रवादी काँग्रेसकडे चार तर एक समिती भाजपला देण्यात आली.पीठासीन अधिकारी तथा तहसीलदार अनिलकुमार हेळकर व सहाय्यक अधिकारी तथा नगरपरिषदेचे मुख्याधिकारी दीपक इंगोले यांनी या निवडीची घोषणा केली. यावेळी स्थायी समितीच्या सभापती म्हणून नगराध्यक्ष जाकीर सौदागर यांची निवड करण्यात आली. यात चार सदस्य निवडण्यात आले. महिला व बालविकास समिती सभापती म्हणून उपनगराध्यक्षा जिनेरी मन्नाबी मतीन, बांधकाम व मागासवर्गीय कल्याण समितीच्या सभापतीपदी भाजपाच्या नगरसेविका उर्मिला विठोबा मदने यांची वर्णी लागली. विशेष म्हणजे, या समितीत सदस्यपदी भाजपचे आ. सुजितसिंह ठाकूर यांचे बंधू सुबोधसिंह ठाकूर व बबड्या उर्फ रामदास भारत जाधव यांची निवड करुन समिती भाजपला देण्यात आली आहे. पाणीपुरवठा व आरोग्य स्वच्छता समिती सभापतीपदी कुरेशी सर्फराज मोहंमद शरीफ तर वाचनालय समितीच्या सभापती म्हणून माने रंजना रामहरी याची निवड करण्यात आली आहे.

परंडा न.प. मध्ये राष्ट्रवादी काँग्रेसचे बहुमत आहे. मात्र काही सदस्यांसोबत नगराध्यक्ष जाकीर सौदागर यांचे गेल्या काही महिन्यांपासून राजकीय वाद आल्यामुळे न.प. मध्ये उस्मानाबाद जिल्हा परिषदेच्या सत्तेचा दाखला घेऊन राजकीय ‘आदर्श’ पॅटर्न राबविण्यात आला आहे.

नळदुर्गात निवडी बिनविरोध

नळदुर्ग : गुरूवारी येथील नगरपालिकेच्या सभागृहात विविध विषय समिती सभापतींच्या निवडी बिनविरोध पार पडल्या. पीठासीन अधिकारी म्हणून उस्मानाबादचे तहसीलदार गणेश माळी उपस्थित होते. यावेळी बांधकाम सभापती म्हणून नगरसेवक बसवराज धरणे (काँग्रेस), बालकल्याण सभापती छमाबाई राठोड, स्वच्छता व आरोग्य सभापती दयानंद बनसोडे, पाणीपुरवठा सभापती सुमन जाधव तर नियोजन व विकास सभापती नितीन कासार (सर्व रा. काँ) यांची निवड करण्यात आली आहे. यावेळी नगरसेवक नितीन कासार, उदय जगदाळे, शहेबाज काझी, निरंजन राठोड, बसवराज धरणे, महालिंग स्वामी, विनायक अहंकारी, मुश्ताक कुरेशी यांच्यासह महिला नगरसेवक आंबूबाई दासकर, सुमनताई जाधव, काझी, कुरेशी आदी उपस्थित होते. निवडीनंतर नूतन सभापतींचा सत्कार करण्यात आला. यावेळी माजी नगरसेवक किशोर नळदुर्गकर, संजय जाधव, सुहास येडगे, तानाजी जाधव, सुनील गव्हाणे आदींसह नगराध्यक्षा रेखाताई जगदाळे, मुख्याधिकारी लक्ष्मण राठोड, कार्यालयीन अधीक्षक लक्ष्मण कुंभार यांची उपस्थिती होती.