माणसांचे लसीकरण लांबले अन् जनावरांचे लटकले...!

उस्मानाबाद : कोरोनाचा संसर्ग झपाट्याने वाढत आहे. त्यामुळे नागरिकांना कोविड प्रतिबंधात्मक लस दिली जात आहे. मात्र, लसीचा पुरवठा कमी होत असल्याने माणसांचे लसीकरण लांबणीवर पडत आहे. त्यातच आता मे महिन्यात होणाऱ्या लसीकरणाचा प्रश्न निर्माण झाला आहे. पशुसंवर्धन विभागाकडून घटसर्प, फऱ्या, आंतरविशार आदी लसीची मागणी शासनाकडे केली आहे. लस मिळाल्यानंतर जनावरांचे लसीकरण सुरू होणार आहे.

कोरोना संसर्गास प्रतिबंध बसावा, यासाठी १६ जानेवारीपासून जिल्ह्यातील नागरिकांचे लसीकरण केले जात आहे. रुग्ण वाढू लागल्याने नागरिक स्वत:हून लस घेण्यास पुढे येत आहेत. मात्र, मागणीच्या तुलनेत लसीचा पुरवठा कमी होत आहे. त्यामुळे लसीकरण मोहिमेस ब्रेक बसत आहे. काही मोजक्याच केंद्रावर लस दिली जात आहे, तर दुसरीकडे जनावरांच्या लसीकरणाचा प्रश्न निर्माण झाला आहे. तोंडखुरी, पायखुरी यासह इतर संसर्गजन्य आजारांपासून संरक्षण करण्यासाठी जनावरांना नोव्हेंबर व मे महिन्यात लसीकरण केेले जाते. नोव्हेंबर महिन्यात जिल्ह्यात पशुंचे सुरळीत लसीकरण झाले आहे. मे महिन्यात मान्सूनपूर्व लसीकरण मोहीम राबविली जात असते. मात्र, सध्या जिल्ह्यास लस प्राप्त न झाल्याने लसीकरण लटकले आहे. पशुसंवर्धन विभागाकडून शासनाकडे लसीची मागणी केली आहे. लस प्राप्त होताच लसीकरण मोहीम राबविली जाणार आहे, असे पशुसंवर्धन विभागातून सांगण्यात आले.

जिल्ह्यातील जनावरांची एकूण आकडेवारी

शेळ्या २०४३१३

मेंढ्या २०५६२

गाय वर्ग ३४६७७५

म्हैस वर्ग १७३१८५

कोणकोणत्या दिला जातात लस

गाय वर्ग म्हैस वर्गास घटसर्प लस दिली जात असते.

फऱ्या आजारास प्रतिबंध बसावा यासाठी गाय वर्ग व म्हैस वर्गास लस देण्यात येते.

शेळ्यांना आंतरविशार लसीकरण करण्यात येते.

कोंबड्यांना मानमोडी आजारापासून संरक्षण मिळावे यासाठी मानमोडी प्रतिबंधात्मक लस टोचली जात असते.

कोट...

जिल्ह्यात पशुंच्या मान्सूनपूर्व लसीकरणाची तयारी झाली आहे. शासनाकडे घटसर्प, फऱ्या, आंतरविशार लसीची मागणी केली आहे. लसीचे डोस प्राप्त झाल्यानंतर जिल्हा परिषदेअंतर्गत येणाऱ्या ९५ पशुवैद्यकीय दवाखाने व राज्याचे ६ पशुवैद्यकीय दवाखान्यात लसीकरण मोहीम राबविली जाणार आहे.

डॉ. नामदेव आघाव,

पशुसंवर्धन अधिकारी, जिल्हा परिषद उस्मानाबाद

नोव्हेंबरमध्ये पाच लाख पशुंना डोस

जिल्ह्यात तोंडखुरी व पायखुरी यासह इतर संसर्गजन्य आजारापासून संरक्षण करण्यासाठी जनावरांना दरवर्षी नोव्हेंबर व मे महिन्यात लस दिली जात असते. गतवर्षी नोव्हेंबर महिन्यात ४ लाख ९६ हजार पशुंचे लसीकरण झाले होते.

पशुपालक चिंतेत

लम्पी स्किन या संसर्गजन्य आजाराचा फटका जनावरांना बसला. त्यातून पशुधन बचावले आहेत. पाळीव जनावरांच्या आजाराकडे पशुधन विभागाकडून उपाययोजना केलेल्या नाहीत. मृग नक्षत्राचा पाऊस झाल्यानंतर आजार बळावण्याची शक्यता आहे. त्यामुळे पशुसंवर्धन विभागाने लसीकरणाची मोहीम राबवावी.

पांडुरंग सातपुते, पुशपालक, गोंधळवाडी.

दरवर्षी मे महिन्यात होणारे जनवारांचे लसीकरण अजून झाले नाही. पावसाळा काही दिवसांवर येऊन ठेपला आहे. पशुसंवर्धन विभागाने लसीकरण मोहीम हाती घेतलेली नाही. यामुळे जनावरांच्या आरोग्याचा प्रश्न गंभीर झाला आहे. जनावरांमध्ये रोगराई पसरण्याची शक्यता अधिक आहे.

प्रदीप सुपेकर, पशुपालक, वारेवडगाव.