२२५ रुपये वाढविले, अन् केवळ १० रुपये कमी केले व्वा रे चालाखी

पूर्वी 'स्टोव्ह' किंवा चुलीवर स्वयंपाक केला जायचा. कालांतराने राॅकेलचा तुटवडा निर्माण होऊ लागला. चुल पेटविण्यासाठी लाकूड देखील मिळेनासे झाल्याने स्वयंपाकासाठी गॅस सिलिंडरचा सर्रास वापर सुरू झाला. त्याचे दरही सर्वसामान्य कुटूंबांच्या आवाक्यात होते. मात्र, मागील वर्षभरापासून सिलिंडरच्या दरात सातत्याने वाढ झाली. टप्प्याटप्प्याने पूर्वी असलेल्या दरात मार्च २०२१ पर्यंत २२५ रूपये वाढविण्यात आले. त्यामुळे सर्वसामान्य नागरिक आर्थिक अडचणीत सापडले आहेत.

चौकट...

गेल्या वर्षभरात सव्वादोनशे रूपयांनी महाग झाले सिलिंडर

गेल्या वर्षी मार्च महिन्यांपासून सिलिंडरचे दरात वाढ होऊ लागली. प्रत्येक महिन्याला ४० ते ५० रुपयांनी वाढत असत. नोव्हेंबर २०२० मध्ये घरगुती गॅस सिलिंडरचे दर ६१० रूपये इतके होते. मार्च महिन्यात ८३५ रूपये झाली आहे.

प्रतिक्रिया...

स्टोव्ह किंवा चुलीवर स्वयंपाक करणे आता अशक्य आहे. त्यामुळे सिलिंडरची भाववाढ झाली तरीही काटकसर करून गॅस सिलिंडरवर स्वंयपाक करावा लागतो. शासनाने ही बाब लक्षात घेऊन वाढविलेले दर कमी करावेत.

ललिता धुमाळे, गृहिणी

जिवनावश्यक वस्तूंच्या किंमती गगनाला भिडल्या असताना मागील काही दिवसांपासून गॅस सिलिंडरच्या किंमतीतही सातत्याने वाढ होत आहे. मार्च महिन्यात ८३५ रूपयांना सिलिंडर घ्यावे लागले. एप्रिल महिन्यात केवळ दहा रूपयांनी सिलिंडर स्वस्त केले. ही सर्वसामान्यांची थट्टाच आहे

ज्योती पांढरे, गृहिणी

नोव्हेंबर महिन्यात ६१० रूपयांना सिलिंडर उपलब्ध होत होते.त्यानंतर सिलिंडरच्या दरात सातत्याने वाढ होत ती ८३५ वर पोहोचली. यामुळे बजेट कोलमडले आहे. शासनाने सिलिंडरची दरवाढ मागे घ्यावी.

रेश्मा सोलापुरे, गृहिणी

महिना सिलिंडर दर

नोव्हेंबर २०२० ६१०.७८

डिसेंबर २०२० ६६०.६४

जानेवारी २०२१ ७१०.५७

फेब्रुवारी २०२१ ७३५.८४

मार्च २०२१ ८३५.५१

एप्रिल २०२१ ८२५.८४