सावरगाव केंद्रात लसीसाठी गर्दी

सावरगाव प्राथमिक आरोग्य केंद्रांतर्गत असलेल्या गावात ४२ हजार ५०० लोकसंख्या आहे. सावरगाव, काटी, मसला (खुर्द), मांळुब्रा, तामलवाडी, गवळेवाडी, येथील उपकेंद्रांत लसीकरण मोहीम राबवून ज्येष्ठ नागरिकांना लस टोचली. मंगळवारी सावरगाव प्राथमिक आरोग्य केंद्रास लसीचे ५०० डोस उपलब्ध झाले. सावरगाव व जळकोटवाडी या दोन ठिकाणी लसीकरणाचे नियोजन केले होते. लसीचा पहिला डोस घेण्यासाठी सावरगाव, काटी, केमवाडी, सांगवी, मांळुब्रा, गंजेवाडी येथील नागरिकांनी गर्दी केली होती. ही लसीकरण मोहीम यशस्वी करण्यासाठी वैद्यकीय अधिकारी डॉ. एस. एम. माशाळकर, डॉ. कराळे, डॉ. नदाफ, डॉ. बारस्कर, डॉ. अजित राठोड, साळवे, औषध निर्माता संदीप जगताप, आरोग्य पर्यवेक्षिका शोभा आदलिंगे, भालशंकर अंबुरे, डुरे पाटील, धनके आदी आरोग्य कर्मचाऱ्यांनी परिश्रम घेतले.

इंटरनेट रेंजअभावी नोंदणीस अडचण

तुळजापूर तालुक्यातील जळकोटवाडी येथे मंगळवारी लसीकरण मोहीम राबविण्यात आली. मात्र, इंटरनेटची रेंज नसल्याने ऑनलाईन नोंदणी करण्यास अडचण निर्माण झाली. अखेर आरोग्य कर्मचाऱ्यांनी लाभार्थ्याचे आधार कार्ड जमा करून पाच किमी अंतरावर असलेल्या सावरगाव प्राथमिक आरोग्य केंद्रात जाऊन ऑनलाईन नोंदणी केली. यानंतर लस टोचणी करण्यात आली. दुपारनंतर गावातील काही तरुणांच्या मोबाईलवरून ऑनलाईन नोंदणी सुरू केली. येथे दुपारी २ वाजेपर्यत १०९ लाभार्थींना लस टोचण्यात आली. दरम्यान, ही समस्या लक्षात घेता, पुढील लसीकरण वडगाव (काटी) येथे करावे, अशी मागणी वडगावच्या सरपंच पुनमताई कोडगीरे यानी केली आहे.