दहा जागांसाठी तामलवाडीत चुरस

तामलवाडी : तुळजापूर तालुक्यातील तामलवाडी ग्रामपंचायतीच्या ११ जागांपैकी एक जागा बिनविरोध झाल्याने १० जागांसाठी निवडणूक होत आहे. ३ हजार मतदार १० सदस्यांची निवड करणार असून, २४ उमेदवार रिंगणात आहेत. त्यात भाजप, महाविकास आघाडी, सर्वधर्म समभाव या तिघांत चुरशीचा सामना रंगणार आहे.

उमेदवारी अर्ज माघार घेण्याच्या दिवशी महाविकास आघाडीचे आप्पासाहेब रणसुरे हे बिनविरोध निवडून आले तर १० जागांसाठी बाजार समितीचे संचालक यशवंत लोंढे, माजी सरपंच दतात्रय वडणे, माजी उपसरपंच हमीद पठाण, माजी सैनिक शिवाजी सावंत, सुधीर पाटील यांच्यासह २४ उमेदवार निवडणूक रिंगणात उतरले आहेत. या ग्रामपंचायतीवर भाजपचे वर्चस्व होते. त्यामुळे पाच वर्ष केलेल्या विकासकामांवर उमेदवार पुन्हा मतदारांसमोर जात आहेत. महाविकास आघाडीने बदल हवा म्हणून निवडणूक रिंगणात दंड थोपटले असून, सर्वधर्म समभाव पॅनेलनेही उमेदवार उभे करून निवडणुकीत रंगत वाढविली आहे.

सध्या प्रचाराने चांगलाच जोर धरला आहे. गृहभेटी, वैयक्तिक गाठीभेटी, सोशल मीडियातून प्रचार, प्रचार रॅलीतून शक्तिप्रदर्शन घडवून बळ वाढविले जात आहे. सरपंचपदाचे आरक्षण जाहीर झाले नसताना ते स्वप्न पाहत विजयी पताका खेचून आणण्याकडे उमेदवार प्रचाराचा जोर वाढत आहेत.

चौकट

पिंपळ्यात एका जागेसाठी निवडणूक

पिंपळा (बु.) ग्रामपंचायतीच्या ८ जागा बिनविरोध निवडून आल्या आहेत. राखीव जागेवरील उमेदवार निवडीवर एकमत न झाल्याने एका जागेसाठी दोन उमेदवारांत लढत होणार आहे. या लढतीकडे गावकऱ्यांचे लक्ष लागले आहे.