लग्नाच्या शूटिंगसाठी ड्रोन वापरणार असाल तर सावधान

गुणवंत जाधवर

उमरगा : प्रत्येकाच्या जीवनातील महत्त्वाचा क्षण म्हणजे लग्न समारंभ असतो. हा क्षण कॅमेरात टिपणे अनेक वर्षांपासून सुरू आहे. त्यात आता ड्रोनद्वारे शूटिंग करण्यास पसंती वाढत आहे. त्यातही प्री-वेडिंग शूटिंगसाठी ड्रोनचा अधिक वापर केला जातो. मात्र ड्रोनचा वापर करताना ते योग्यरित्या उडविता येणे महत्त्वाचे आहे. त्यामुळे दक्षता म्हणून ज्याच्याकडे प्रमाणपत्र आहे, त्यांच्याकडून शूटिंग केल्यास धोका कमी होतो. मात्र, ही बाब अनेकजण गांभिर्याने घेत नसल्याचे दिसत आहे.

ड्रोनद्वारे शूटिंग करायचीच असेल तर प्रशिक्षित ड्रोनचालकाकडूनच ती करणे गरजेचे आहे. नुकत्याच जम्मू-काश्मीरमध्ये हवाई दलाच्या कार्यालयावर झालेल्या ड्रोन हल्ल्याच्या पार्श्वभूमीवर देशभरात अलर्ट जारी करण्यात आला असून, याच अनुषंगाने संवेदनशील ठिकाणी विनापरवाना ड्रोन विक्री आणि उडवण्यास बंदी आहे; मात्र या नियमावलींचे सर्रास उल्लंघन होताना दिसत आहे.

ड्रोन उडविण्यासाठी परवाना हवा!

१. ड्रोन उडवायचे झाल्यास त्यासाठी लायसन्स हवे असते. ज्या भागात ड्रोन उडवायचे आहे, त्या भागातील पोलीस ठाण्यात यासाठी अर्ज द्यावा लागतो.

ड्रोनचे लायसन्स हे दिल्ली येथील डीजीसीए या संस्थेकडून दिले जाते. त्यासाठी अर्ज करून हे लायसन्स मिळवावे लागते.

उस्मानाबाद जिल्ह्यात अद्याप नियमाचे काटेकोर पालन होताना दिसत नाही. सर्रास विनापरवाना ड्रोनचा वापर केला जात आहे.

प्रशिक्षण घेऊनच ड्रोन उडवा-

ड्रोन उडविण्यासाठी प्रशिक्षण घेणे आवश्यक आहे. प्रशिक्षण घेतलेले असल्यास यात सर्वांचीच सुरक्षितता राहू शकते. लग्नासाठी दिवसाला १० हजार रुपये भाडे देऊन उस्मानाबाद, लातूर, सोलापूर आदी ठिकाणाहून ड्रोन भाड्याने घेतले जातात.

- मनीष सोनी, उपाध्यक्ष, फोटोग्राफर असोसिएशन, उमरगा

ड्रोन वापरण्याचेही नियम-

ड्रोन उडवायचे असल्यास त्यासाठी प्रशिक्षण घेणे आवश्यक आहे.

कोणत्याही भागात ड्रोन उडवायचे असल्यास यासाठी पोलिसांकडून परवानगी घेणे आवश्यक आहे.

१०० फुटापेक्षा अधिक उंचीवरून ड्रोन उडविता येत नाही

ज्या भागात शूटिंग करायची आहे, त्या भागातील पोलीस ठाण्यात अर्ज द्यावा लागतो.

विमानतळ, जिल्हाधिकारी कार्यालयासह सर्वच शासकीय कार्यालय परिसरात ड्रोन उडविता येत नाही.

विनापरवानगी ड्रोन उडविल्यास कारवाई होऊ शकते. त्यामुळे एकतर परवाना अथवा प्रमाणपत्र आ‌वश्यक आहे.

दिवसाला दहा हजार रुपये भाडे

लग्न समारंभात ड्रोनद्वारे शूटिंग करायची झाल्यास ती ‘प्री वेडिंगच’ अधिक असते. त्यामुळे या दिवसासाठी अधिक खर्च केला जातो. एक दिवसाला दहा हजार भाडे द्यावे लागते. उस्मानाबाद, लातूर सोलापूर येथून यासाठी ड्रोन मागवले जातात.

ड्रोनद्वारे शूटिंग करण्यास पसंती वाढत असल्याने त्यांचे भावही काहीसे वधारत आहेत.

लग्न समारंभात एका दिवसाच्या शूटिंगसाठी दहा हजार रुपयापेक्षा जास्त खर्च येतो. यात शहराबाहेर जायचे असल्यास अधिक खर्च येतो.