पोलिस असल्याचे सांगून खंडणी उकळणारा जेरबंद

कळंब : पोलिस असल्याचा बनाव करत एका व्यक्तिकडून खंडणी उकळणाऱ्या तोतयास कळंब पोलिसांनी अटक केली आहे. त्याच्याकडून पत्रकार असल्याचे ओळखपत्र व एक ‘एअर गन’ ही हस्तगत करण्यात आली आहे.

एखाद्या सिनेमाचे कथानक असल्यासारखी ही हकिकत घडली आहे तालुक्यातील इटकूर येथे. पोलिस सूत्राकडून मिळालेल्या माहितीनुसार शनिवारी ईटकूर येथील नारायण मुरलीधर गंभिरे यांच्याकडे एक व्यक्ती आला. तो स्वतःला पोलिस असल्याचा भासवत होता. यावेळी त्यांनी मागच्या दोन वर्षापूर्वी तुमच्यावर जुगाराचा गुन्हा दाखल झाला होता, असे सांगत ‘मी साहेब आहे, मला हप्ता द्या, नाहीतर गुन्हा दाखल करेल’, असे गंभिरे यांना धमकावत पन्नास हजार मागितले. यानंतर घाबरलेल्या गंभिरे यांनी जवळचे दहा हजार दिले. परत, दुसऱ्या दिवशी म्हणजे रविवारी या व्यक्तीने गंभीरे यांच्याकडे येऊन मोठी रक्कम मागितली.

यावर गंभिरे व त्यांचा मुलगा खातरजमा करण्याचा प्रयत्न करत असताना त्यांचे मोबाईल हिसकावून घेत ‘मोठे साहेब टोकणीवर थांबले आहेत, तेथे या’, असे बजावले.

यानंतर गंभिरे पिता पुत्रांना त्या ‘साहेबांचा’ संशय आला. कोणत्या ऑफीसला आहात? अशी गंभिरे यांनी विचारणा केली असता एकाचवेळी एका दैनिकाचा पत्रकार असल्याचे व पोलिस अधिकारी असल्याचे कार्ड दाखवले. यावर पोलिस असल्याचा बनाव करणारा तो व्यक्ती ‘तोतया’ असल्याची खात्री पटल्यानंतर ग्रामस्थांनी सदर घटनेची माहिती कळंब पोलिसांना देत त्या ठकसेन साहेबाला पकडून ठेवले. यानंतर सपोनि अशोक पवार यांच्या मार्गदर्शनाखाली पोउनि सी. एस. गुसिंगे यांच्या पथकाने तात्काळ इटकूर गाठत पोलिस असल्याचा बनाव करत खंडणी उकळणाऱ्या त्या व्यक्तीस ताब्यात घेतले.

सदर व्यक्तीविरुद्ध नारायण गंभिरे यांनी दिलेल्या फिर्यादीवरून कळंब पोलिसांत गुन्हा दाखल करण्याची प्रक्रिया रात्री सुरू होती. त्या व्यक्तिकडूुन एका दैनिकाचा वार्ताहर असल्याचे ओळखपत्र व एक एअर गन ही ताब्यात घेतली असल्याचे पोउनि सी. एस. गुसिंगे यांनी सांगितले.