रांची - सध्या सुरू असलेल्या लगीनसराईच्या दिवसांत काही वधू वरांच्या विवाहाआधीच्या प्रेमसंबंधामधून ऐन लग्नात काही धक्कादायक प्रकार घडत आहेत. त्यांची चर्चाही चवीने केली जात आहे. अशाच एका अपूर्ण राहिलेल्या लग्नाची चर्चा सुरू आहे. लग्नसोहळ्यामध्ये विधी सुरू असतानाच मोबाईलवर आलेल्या एका मेसेजनंतर नवरा मंडप सोडून पळाल्याची धक्कादायक घटना समोर आली आहे.
हा प्रकार गिरिडीह जिल्ह्यातील बेगाबाद क्षेत्रात एका हॉटेलमध्ये लग्नसोहळा सुरू असताना घडला. लग्नात सिंधूर दान न करताच लग्नमंडपातून वर निघून गेला. त्यानंतर वधूचे नातेवाईकही वधूला घेऊन निघून गेले. लग्नातील सर्व विधी जवळपास पूर्ण झाले होते. केवळ सिंधूरदान बाकी होते. तेवढ्यात हा प्रकार घडला. या प्रकाराची आता परिसरात जोरदार चर्चा सुरू आहे.
त्याचे झाले असेकी सिंधूरदानाची तयारी सुरू असतानाच वराच्या मोबाईलवर एक मेसेज आला. त्यात लिहिले होते की, त्याची होणारी पत्नी अन्य कुणाची तरी प्रेयसी होती. तसेच त्याच दिवशी तिच्या प्रियकराची हत्या झाली आहे. हा मेसेज मिळताच वर तिथून फरार झाला. त्यानंतर हे प्रकरण पोलिसांकडे पोहोचले आहे. वधूच्या नातेवाईकांनी वरपक्षावर हुंड्याचा आरोप केला आहे. त्यानंतर आता पोलिसांनी तपास सुरू केला आहे.
काही दिवसांपूर्वीच रेल्वे ट्रॅकवर या तरुणीच्या म्हणजेच वधूच्या प्रियकराचा मृतदेह सापडला होता. त्या मेसेजसह वधू आणि तिच्या प्रियकरामधील संबंधाचे काही अजून मेसेज वराला मिळाले. त्यानंतर त्याने लग्नमंडपातून काढता पाय घेतला. वर पळाल्याचे समजताच लग्नमंडपात गोंधळ उडाला. तसेच पोलिसांकडे परस्परांविरोधात गुन्हे दाखल करण्यात आले होते.