Crime News Karnataka : कर्नाटकची राजधानी बंगळुरूपासून जवळपास १०० किमी अंतरावर तुमकुरु जिल्हा आहे. त्यातल्या चिंपुगनहल्ली येथे एक अशी रक्तरंजित घटना घडली, ज्यामुळे संपूर्ण कर्नाटकात खळबळ उडाली आहे. या परिसरात एका महिलेची हत्या करून तिच्या शरीराचे तब्बल १९ तुकडे करण्यात आले. त्यानंतर प्रत्येक तुकडा १९ वेगवेगळ्या ठिकाणी टाकण्यात आला. पोलिसांनी आता या हत्येचा उलगडा केला आहे. या प्रकरणात महिलेच्या जावयासह ३ जणांना अटक करण्यात आली आहे.
चिंपुगनहल्ली येथेच या मृतदेहाचे तुकडे पोलिसांना सापडले. टाईम्स ऑफ इंडियाच्या वृत्तानुसार, फॉरेन्सिक तज्ज्ञांनी हे स्पष्ट केले होते की, हा मृतदेह एका महिलेचा आहे. त्या महिलेच्या शरीराच्या तुकड्यांवर दागिने तसेच असल्याने ही हत्या चोरीच्या उद्देशाने झाली असावी ही शक्यता नाहीशी झाली. यानंतर, पोलिसांनी परिसरातील बेपत्ता महिलांबद्दल माहिती गोळा करण्यास सुरुवात केली. एसपी अशोक केव्ही यांनी या प्रकरणात अनेक पथके तैनात केली होती.
या तपासादरम्यान पोलिसांना कळले की बेल्लावी येथील रहिवासी ४२ वर्षीय लक्ष्मीदेवम्मा बेपत्ता आहेत. त्यांचे पती बसवराज यांनी या संदर्भात पोलिसांत तक्रार दाखल केली होती. ही महिला ३ ऑगस्ट रोजी हनुमंतपुरा येथील त्यांची मुलगी तेजस्वीच्या घरातून बाहेर पडताना शेवटची दिसली होती. सुरुवातीला पोलिसांना फक्त शरीराचे काही अवयव सापडले होते, पण डोके सापडले नाही. पुढील तपासादरम्यान त्यांना महिलेचे डोकेही सापडले. लक्ष्मीदेवम्मा यांच्या पतीने मृतदेहाची ओळख पटवली.
पोलीस पथकाला ३ ऑगस्ट रोजीच एक पांढऱ्या रंगाची मिनी एसयूव्ही हनुमंतपुरा येथून कोरतागेरेला गेल्याचे आढळून आले. तपास केल्यावर असे दिसून आले की दोन्ही वाहनांच्या नंबर प्लेट वेगवेगळ्या होत्या. मूळ क्रमांकाची तपासणी करून, पोलीस उर्डीगेरे गावातील शेतकरी सतीश यांच्यापर्यंत पोहोचले. फोन रेकॉर्ड तपासताना असे दिसून आले की लक्ष्मीदेवीअम्मा गायब झाल्याच्या दिवशी सतीशचा फोन बंद होता आणि दुसऱ्या दिवशीही बंद होता.
अहवालानुसार, खबऱ्यांनी पोलिसांना सांगितले की ३ आणि ४ ऑगस्ट रोजी सतीशच्या शेतात एसयूव्ही दिसली होती. पोलिसांनी सतीशला पोलीस स्टेशनला बोलावले तेव्हा तो चिंगमालुरुमध्ये होता. पोलिसांनी त्याचा पाठलाग केला आणि त्याला किरण नावाच्या एका साथीदारासह होरानाडू मंदिरात पकडले. सुरुवातीला दोघांनीही आम्ही निर्दोष असल्याचा दावा केला.
गाडीतून मिळाले महत्त्वाचे पुरावे!
पोलिसांनी गाडीची माहिती काढली तेव्हा असे आढळून आले की ती ६ महिन्यांपूर्वी डॉ. रामचंद्रय्या एस. यांनी खरेदी केली होती. ती सतीशच्या नावाने खरेदी केली होती, जेणेकरून कोणताही संशय येऊ नये. तपासात असे दिसून आले की डॉ. रामचंद्रय्या यांनी मृत महिलेची मुलगी तेजस्वीशी लग्न केले होते. एका पोलीस अधिकाऱ्याने सांगितले की, 'आम्ही डॉक्टरांना सतीश आणि किरण यांच्याशी समोरासमोर बोलावले. आम्ही त्यांना समोरासमोर बसवले आणि त्यांची चौकशी केली. त्यानंतर सतीश काहीही लपवू शकला नाही आणि काही वेळातच इतर दोघांनीही सर्व काही कबूल केले.
हत्येमागील कारण काय?
मीडिया रिपोर्टनुसार, डॉ. रामचंद्रय्या यांनी या महिलेच्या मुलीशी दुसरे लग्न केले होते. मात्र, या महिलेला हे लग्न मान्य नव्हते. कारण, रामचंद्रय्याचे आधीच एक लग्न झाले होते आणि त्याने आपल्या पहिल्या पत्नीला घटस्फोट दिला नव्हता. इतकंच नाही तर, त्यांच्या मुलीच्या वयात तब्बल २० वर्षांचे अंतर होते. रामचंद्रय्या यांना भीती होती की लक्ष्मीदेवम्मा त्यांचे कुटुंब उद्ध्वस्त करतील. अशा परिस्थितीत, त्यांनी घटनेच्या ६ महिने आधीपासून नियोजन सुरू केले. त्यांनी सतीशच्या नावाने एक कार खरेदी केली आणि सतीश आणि किरण यांना प्रत्येकी ४ लाख रुपये देण्याचे आश्वासन दिले. त्यांनी दोघांनाही अ‍ॅडव्हान्स म्हणून ५०,००० रुपयेही दिले. पोलिसांच्या माहितीनुसार, सतीश हा रामचंद्रय्याचा रुग्ण होता आणि त्याच्या घराजवळ राहत होता. पोलिसांनी सांगितले की किरण हा सतीशचा चुलत भाऊ आहे.३ ऑगस्ट रोजी, लक्ष्मीदेवम्मा तिच्या मुलीच्या घरून परत येत असताना, रामचंद्रय्या यांनी तिला घरी सोडण्याचे आश्वासन देऊन लिफ्ट दिली. सतीश आणि किरण देखील गाडीत होते. महिला बसताच दोघांनीही तिचा गळा दाबून खून केला. दुसऱ्या दिवशी, मृतदेह धारदार शस्त्रांनी कापण्यात आला आणि त्याचे तुकडे १९ ठिकाणी फेकण्यात आले. यापूर्वी, हे प्रकरण मानवी बलिदानाशी देखील जोडले जात होते. परंतु एसपी अशोक यांनी ही हत्या मानवी बलिदानाशी संबंधित असल्याच्या वृत्तांना नकार दिला.