बीडमधील सरपंच संतोष देशमुख हत्या प्रकरणात फरार असलेला वाल्मिक कराड हा पुण्यात सीआयडीला शरण येण्याची शक्यता वर्तविण्यात येत आहे. यामुळे पुण्यातील CID मुख्यालयाबाहेर पोलीस बंदोबस्त वाढविण्यात आला असून धनंजय मुंडे समर्थकही जमू लागले आहेत.
मस्साजोग या गावचे सरपंच संतोष देशमुख यांच्या हत्येप्रकरणातील आरोपींच्या शोधासाठी सीआयडीने मोठी कारवाई केली आहे. सीआयडीने सर्व आरोपींची संपत्ती जप्त करण्यास सुरुवात केली आहे. या हत्येच्या प्रकरणात वाल्मिक कराड हे मास्टरमाइंड असल्याचा आरोप होत आहे. अशातच भाजपाचे आमदार सुरेश धस हे मुंडेंवर वेगवेगळे खुलासे करत असून विरोधकांनीही मुंडेंच्या राजीनाम्याची मागणी केलेली आहे. अशातच मुख्यमंत्री देवेंद्र फडणवीस आणि मुंडे यांच्यात बैठक झाली असून यात कराडच्या शरण येण्यावर निर्णय झाल्याचे समजते आहे.
वाल्मिक कराड आज पुण्यात शरण येणार असल्याची शक्यता असून यामुळे CID मुख्यालयाबाहेर पोलीस बंदोबस्त वाढवण्यात आला आहे. CID ची पथके मागील पंधरा दिवसापासून वाल्मिकी कराड यांचा शोध घेत आहेत. परंतू तो त्यांना सापडू शकला नव्हता. वाल्मिक कराडच्या शेवटच्या लोकेशनबाबत मोठी अपडेट समोर आली होती. कराड याचे शेवटचे लोकेशन मध्य प्रदेशातील उज्जैनमध्ये होते, यानंतर त्याचा फोन बंद असल्याचे समोर आले आहे. परंतू, तो त्याच्या आकांसोबत टचमध्ये असल्याचा दावा धस यांनी केला होता. सरेंडर करण्यावरून या दोघांमध्ये वादही झाल्याचे ते म्हणाले होते.
दरम्यान, देशमुख यांच्या हत्या प्रकरणाला तीन आठवडे पूर्ण झाल्यानंतरही या प्रकरणातील तीन आरोपी फरार असल्याने देशमुख कुटुंबासह सर्वसामान्य नागरिकांकडून संताप व्यक्त केला जात आहे. बीडपोलिसांकडून या घटनेचा तपास सीआयडीकडे वर्ग करण्यात आल्यानंतर या तपासाची स्थिती काय आहे, याची माहिती घेण्यासाठी मृत संतोष देशमुख यांचे बंधू धनंजय देशमुख यांनी सोमवारी सीआयडीच्या अधिकाऱ्यांची भेट घेतली.