Video : नशीब बलवत्तर! लाॅन्चमधून समुद्रात प्रवासी पडला, पोहता येत असल्याने वाचला जीव
By ऑनलाइन लोकमत | Updated: February 8, 2022 17:14 IST2022-02-08T16:13:53+5:302022-02-08T17:14:34+5:30
Drowning Case : सुदैवाने त्या प्रवाशाला पोहता येत असल्यामुळे तो सुखरूप बोटीत परतला. या घटनेमुळे जल प्रवासादरम्यान प्रवाशांची सुरक्षा वाऱ्यावर कशी आहे. हे पुन्हा सिध्द झाले आहे.
Video : नशीब बलवत्तर! लाॅन्चमधून समुद्रात प्रवासी पडला, पोहता येत असल्याने वाचला जीव
निखिल म्हात्रे अलिबाग - गेट वे मुंबई येथून मांडवा, अलिबागकडे येणार्‍या अजंटा लॉन्चमधून एक प्रवाशी समुद्रात पडल्याची धक्कादायक घटना मंगळवारी सकाळी 10 वाजण्याच्या सुमारास घडली. सुदैवाने त्या प्रवाशाला पोहता येत असल्यामुळे तो सुखरूप बोटीत परतला. या घटनेमुळे जल प्रवासादरम्यान प्रवाशांची सुरक्षा वाऱ्यावर कशी आहे. हे पुन्हा सिध्द झाले आहे. प्रशांत खामकर असे पाण्यात पडलेल्या प्रवाशांचे नाव आहे. प्रशांत यांनी आपण स्वतःच्या चुकीमुळे पडलो असल्याचे मांडवा पोलिस ठाण्यात लेखी दिले आहे, अशी माहिती पाेलिस सहायक निरीक्षक राजा पाटील यांनी दिली.
आज सकाळी नऊ वाजता गेट वे वरून सुटलेली अजंटा लॉन्च मांडवा-अलिबागकडे येत होती. मांडव्यापासून काही अंतरावर असतानाच बोटीच्या गेटला लावलेली फळी तुटली. त्यामुळे प्रशांत खामकर हा प्रवाशी थेट समुद्रात पडला. त्यामुळे प्रवाशांमध्ये भीतीचे वातावरण निर्माण झाले होते.
अलिबाग - लाॅन्चमधून समुद्रात प्रवासी पडला, पोहता येत असल्याने वाचला जीव pic.twitter.com/jDxB55eBY4
— Lokmat (@lokmat) February 8, 2022
प्रवाशांनी आरडा ओरड सुरू केली. मात्र प्रशांतला पोहता येत असल्यामुळे तो स्वतः पोहत बोटीत सुखरूप परतला. प्रशांत यांना बाेटीतील कर्मचाऱ्यांनी दाेरीच्या सहायाने बाेटीमध्ये घेतले. बोटीच्या गेटजवळील फळीला टेकू नकोस असे त्याला सांगण्यात आले होते मात्र त्यांनी त्याकडे दुर्लक्ष केले आणि पुढील प्रसंग घडल्याचे बोट कर्मचार्‍यांनी सांगितले.दरम्यान, या घटनेनंतर फेरी बोटीतील सुरक्षतेचा प्रश्न ऐरणीवर आला आहे. त्या प्रवाशाला पोहोता येत नसते तर जीव गमवाव लागला असता अशा प्रतिक्रिया व्यक्त होत आहेत.
