भिवंडीत दोन अल्पवयीन मुलींवर अत्याचार; आरोपी पवनकुमार केसरवाणीला २० वर्षे सश्रम कारावास

अत्याचाराची घटना २०२० मध्ये घडली होती

लोकमत न्यूज नेटवर्क, भिवंडी: अल्पवयीन दोन मुलींवरील अत्याचार प्रकरणातील आरोपीला भिवंडी सत्र न्यायालयाने गुरुवारी २० वर्षे सश्रम कारावासाची शिक्षा सुनावली. अत्याचाराची घटना २०२० मध्ये घडली होती.

भिवंडी शहर पोलिस ठाणे क्षेत्रात पाच वर्षांच्या दोन मुलींवर आरोपी पवनकुमार दिनेशचंद केसरवाणी (वय ३० वर्ष रा.भाग्यनगर, कामतघर) याने अत्याचार केला होता. याबाबत २०२० मध्ये दाखल गुन्ह्याची सुनावणी भिवंडी अतिरिक्त जिल्हा आणि सत्र न्यायालयात न्यायाधीश एन.के. कारंडे यांच्या न्यायालयात झाली. सरकारी वकील ॲड.सी.बी. नवले आणि ॲड.व्ही.एम. मुंडे यांनी सरकारी बाजू मांडली.

भिवंडी शहर पोलिस ठाण्याचे वरिष्ठ पोलिस निरीक्षक कृष्णदेव खराडे यांच्या मार्गदर्शनात तपास अंमलदार सेवानिवृत्त पोलिस उपनिरीक्षक अनिल पाटील, कोर्ट पैरवी अधिकारी पोलिस हवालदार अभिमन्यू पाटोळे, महिला पोलिस शिपाई ए. एस. सगाठीया, समन्स व वॉरंट बजावणारे पोलिस शिपाई मढवी व रामराजे यांनी गुन्ह्यातील पुरावे सादर केले. न्यायालयाने केसरवाणी यास २० वर्ष सश्रम कारावासाची शिक्षा सुनावली. यासह ५ हजार दंड रक्कम न भरल्यास सहा महिने साध्या कारावासाची शिक्षा सुनावली.