पाकिस्तानला सीक्रेट माहिती पुरवणाऱ्या तिघांना अटक; राज्य दहशतवाद विरोधी पथकाची कारवाई

सदर संशयित इसमाची नोव्हेंबर २०२४ मध्ये फेसबुकद्वारे एका पीआयओसोबत ओळख झाली होती.

मुंबई - सोशल मीडियाद्वारे पाकिस्तान इंटेलिजेंस ऑपरेटिव्ह (पीआयओ) यांना प्रतिबंधित क्षेत्राची माहिती देणाऱ्या संशयित तरुणांसह त्याच्या संपर्कातील दोघांविरुद्ध गुन्हा नोंदविण्यात आला आहे. या गुन्ह्यात संशयित व्यक्तीला अटक करण्यात आली आहे. राज्य दहशतवाद विरोधी पथकाने ही कारवाई केली. 

चौकशीवेळी असा खुलासा झाला की, सदर संशयित इसमाची नोव्हेंबर २०२४ मध्ये फेसबुकद्वारे एका पीआयओसोबत ओळख झाली होती. संशयित इसमाने नोव्हेंबर २०२४ ते मार्च २०२५ या कालावधीत नमूद पीआयओला WhatsApp द्वारे भारत सरकारने प्रतिबंधित केलेल्या क्षेत्रातील गोपनिय माहिती वेळोवेळी पुरविली असल्याचे निष्पन्न झाले. त्यानुसार दहशतवाद विरोधी पथकाने शासकीय गुपिते अधिनियम १९२३ चे कलम ३(१) (ब), ५ (अ) सह भारतीय न्याय संहिता २०२३ चे कलम ६१ (२) अन्वये गुन्हा दाखल करण्यात आला आहे. या गुन्ह्यात अटक करण्यात आली असून दहशतवाद विरोधी पथकाकडून पुढील तपास करण्यात येत असल्याचे सांगितले. 

माजी मंत्र्याचा सचिव, पाकिस्तानला पुरवत होता गुप्त माहिती

‘ऑपरेशन सिंदूर’नंतर भारतात पाकिस्तानी गुप्तचर संस्थांसाठी काम करणाऱ्या एजंट्सचा पर्दाफाश करण्यासाठी सुरक्षा यंत्रणा सजग झाल्या आहेत. अशाच मोहिमेअंतर्गत राजस्थानच्या जैसलमेरमधून एका व्यक्तीला ताब्यात घेण्यात आले आहे. सरकारी कर्मचारी म्हणून काम करणाऱ्या शकूर खान याला भारताची गुप्त आणि संवेदनशील माहिती पाकिस्तानला पुरवल्याच्या आरोपावरून अटक करण्यात आली आहे. शकूर खान सध्या जैसलमेरच्या रोजगार विभागात कार्यरत होता. तो माजी कॅबिनेट मंत्री शाले मोहम्मद यांचा खाजगी सचिव देखील होता. तो गेल्या काही वर्षांपासून पाकिस्तानी गुप्तचर संस्थेच्या संपर्कात होता आणि  संवेदनशील माहिती त्यांच्यासोबत शेअर करत होता.