पंजाबमध्ये एक धक्कादायक घटना घडली आहे. पटियाला जिल्ह्यातील बनूड भागात एका टॅक्सी चालकाने प्रेमविवाह केल्यानंतर अवघ्या सात दिवसांनी विष पिऊन आत्महत्या केली. दिलप्रीत सिंह असं या चालकाचं नाव असून त्याचा मृतदेह त्याच्या इनोव्हा कारमधून सापडला आहे. पोलिसांनी चालकाची पत्नी आणि सासू यांच्याविरुद्ध आत्महत्येस प्रवृत्त केल्याप्रकरणी गुन्हा दाखल केला आहे, मात्र सध्या दोघीही फरार आहेत.
दिलप्रीत सिंहचे वडील बलविंदर सिंह यांनी पोलिसांकडे तक्रार दिली आहे की, त्यांचा मुलगा स्वतःची इनोव्हा कार टॅक्सी म्हणून चालवत असे. काही काळापूर्वी त्याचे बार अटेंडंट म्हणून काम करणाऱ्या जिरकपूर येथील रहिवासी मनप्रीत कौरसोबत प्रेमसंबंध होते. दोघांनी 9 जुलै 2023 रोजी लग्न केले. लग्नानंतर मनप्रीत कौर आपला मुलगा दिलप्रीत सिंह याला मनौली गावात जाण्यापासून रोखत असे. यावरून दोघांमध्ये वाद सुरू झाला.
बलविंदर सिंहच्या म्हणण्यानुसार, दिलप्रीत सिंह पत्नी आणि सासूसोबत त्यांच्याच घरात राहू लागला. 16 जुलै 2023 रोजी दिलप्रीत सिंह त्याच्या वडिलांना भेटण्यासाठी मनौली गावात आला होता. त्यानंतर त्याची पत्नी व सासूही तेथे पोहोचली आणि त्यांच्याशी भांडण करण्यास सुरुवात केली. या संपूर्ण घटनेत अपमानास्पद वाटून दिलप्रीत सिंह आपल्या गाडीतून निघून गेला. रात्री तो परत न आल्याने पोलिसांना माहिती देऊन त्याचा शोध सुरू करण्यात आला.
17 जुलै रोजी उड्डाणपुलाखाली उभ्या असलेल्या इनोव्हा कारमधून दिलप्रीत सिंहचा मृतदेह सापडला. पोलिसांनी दिलेल्या माहितीनुसार, दिलप्रीत सिंहने विषारी द्रव्य प्राशन करून आत्महत्या केली. मिळालेल्या माहितीनुसार, जीव देण्यापूर्वीच दिलप्रीत सिंहने पत्नीला फोन केला होता. फोनवरूनच दोघांमध्ये खूप भांडण झाले. स्टेशन हाऊस ऑफिसर बानूर किरपाल सिंह यांनी सांगितले की, टॅक्सी चालकाची पत्नी मनप्रीत कौर आणि सासू कुलदीप कौर यांच्या विरोधात गुन्हा दाखल करण्यात आला आहे. सध्या दोघेही फरार आहेत. एका हिंदी वेबसाईटने याबाबतचे वृत्त दिले आहे.