मुंबई: आपल्या पत्नीकडून एक भोंदू बाबा पैसे उकळण्याचा प्रयत्न करीत असल्याचे समजल्यावरून पतीने विकास उनियाल (३४) या भोंदू बाबाविरोधात खेरवाडी पोलिस ठाण्यात तक्रार नोंदवली आहे. सदर तक्रारदाराच्या मैत्रिणीशी असणाऱ्या कथित अनैतिक संबंधाच्या संशयावरून तक्रारदाराच्या पत्नीने या अघोरी बाबाच्या साथीने मैत्रिणीवर करणी करण्याबद्दल चर्चा केली होती, त्या संबंधात मिळालेल्या माहितीमुळे पतीने थेट भोंदू बाबावरच गुन्हा दाखल केला. या प्रकरणातील तक्रारदार हे फर्निचर व्यावसायिक असून ते जोगेश्वरीतील ओशिवरा भागात राहातात.
पत्नीला त्यांच्या चारित्र्यावर संशय आहे, त्यामुळे त्यांच्यात सतत भांडणेही होत. पत्नीने माहिती समजावी म्हणून भोंदूबाबाला ४-५ लाख रुपये दिल्याचे पतीचे म्हणणे आहे. १२ जून रोजी सदर व्यावसायिकाची पत्नी घरातून २५ हजार रुपये घेऊन बाहेर पडली आणि ती रिक्षातून जात होती. तेव्हा मोबाइलवरून ती एका व्यक्तीबरोबर अघोरी विद्येसंबंधी चर्चा करीत होती. या चर्चेचे रेकॉर्डिंग या रिक्षावाल्याने केले. सदर रिक्षावाला हा व्यावसायिकाला ओळखत होता, त्याने ही माहिती सदर तक्रारदाराला दिली. तक्रारदाराच्या मैत्रिणीला मारण्यासाठी व तिला अर्धांगवायूचा झटका यावा म्हणून १३ दिवस होम-हवन करू असे तक्रारदाराच्या पत्नीला या बाबाने सांगितल्याचे पतीचे म्हणणे आहे.
पत्नीकडे १० हजाराची मागणी-
या कामासाठी तो पत्नीकडे १० हजाराची मागणी करीत होता. पत्नी व भोंदू बाबा पुढील चर्चेसाठी वांद्रे पूर्व परिसरातील चिनार रेस्टॉरंटमध्ये भेटणार होते, अशी माहितीही रिक्षावाल्याने केलेल्या रेकॉर्डिंगवरून मिळाली. त्यावरून पती तेथे जाण्यास निघाला असता त्याला पोलिसांची गाडी दिसल्याने त्याने पोलिसांना प्रकार कानावर घातला आणि नंतर खेरवाडी पोलिस ठाण्यात बाबाविरोधात गुन्हा दाखल केला.