वसई - हिंगणघाट मागोमाग लासलगाव येथील घटना ताजी असतानाच वसईमध्ये भरदिवसा राहत्या घरातच एका महिलेला विवस्त्र करण्याचा प्रयत्न करण्यात आला. महिला घरात एकटीच असल्याचं पाहून दोन अज्ञातांनी घरात घुसून त्यांचा विनयभंग करत फोटो काढले. दुपारी पावणेबारा वाजण्याच्या सुमारास ही घटना घडली. याप्रकरणी माणिकपूर पोलिसांनी दोन अज्ञात व्यक्तींविरोधात विनयभंगाचा गुन्हा दाखल करून, शोधमोहीम सुरू केली आहे. याबाबत पोलीस या गुन्ह्याचा सविस्तर तपास करत असून त्याची सत्यता तपासून कारवाई केली जाईल असे माणिकपूर पोलीस ठाण्याचे वरिष्ठ पोलीस निरीक्षक राजेंद्र कांबळी यांनी लोकमतशी बोलताना सांगितले.
पीडित महिला ही पाच महिन्यांची गरोदर असून पोलीस भरतीचे क्लास घेते. घटना घडली त्यावेळी पीडित महिलेच्या घरात कुणीही नव्हते. पीडित महिलेचे कपडे काढलेल्या अवस्थेतले फोटोही आरोपींनी काढले. याप्रकरणी माणिकपूर पोलीस ठाण्यात आरोपींविरोधात गुन्हा दाखल करण्यात आला. रविवार असल्याने क्लासला सुट्टी होती. पती कामावर गेले होते. त्यामुळे त्या एकट्याच घरी होत्या. त्यावेळी दुपारी पावणेबाराच्या दरम्यान घराची बेल वाजली. दरवाजा उघडल्यानंतर दोन अनोळखी इसमांनी पती कुठे आहे असे विचारले. त्यावर ते कामावर गेल्याचे महिलेने सांगितले. त्यांनतर आम्हाला तुमच्याशी बोलायचं आहे सांगून दोघे बळजबरीने घरात घुसले. पीडितेला धक्का देऊन तिचा विनयभंग केला. यावेळी तिला विवस्त्र करण्याचा प्रयत्न करुन तिचे फोटोही काढले. घटनेनंतर पीडित महिलेने तत्काळ माणिकपूर पोलीस ठाण्यात धाव घेऊन तक्रार नोंदवली. पोलिसांनी दोन अज्ञातांविरोधात गुन्हा दाखल केला असून तपास सुरू केला आहे.