धक्कादायक! गोव्यात युवतीवर बलात्कार करून हत्या  

तिचे तोंड व नाक दाबून गुदबरून ठार मारल्याचे अहवालात म्हटले आहे.

ठळक मुद्देवैद्यकीय अहवालातील निष्कर्षामुळे तिचा खून केल्याचे उघड झाले आहे. वर्षभरापूर्वी याच साल्वादोर द मूंद येथील चिरेखणीत एका युवतीचा मृतदेह सापडला होता.

पणजी - साल्वादर द मूंद - पर्वरी येथे ३५ वर्षीय युवतीवर बलात्कार करून तिचा हत्या केल्याचे उघडकीस आले आहे. युवतीचा खून करून तिला साल्वादोर द मूंद येथील चिरेखणीत टाकण्यात आले होते. वैद्यकीय अहवालातील निष्कर्षामुळे तिचा खून केल्याचे उघड झाले आहे. 

खूनाचा प्रकार नेमका केव्हा घडला याची माहिती पोलिसांना नाही, परंतु युवतीचा मृतदेह साल्वादोर द मुंद येथील चिरेखाणीत आढळल्यामुळे लोकांनी याची माहिती पर्वरी पोलिसांना दिली. युवतीची ओळख पटली नव्हती. पोलिसांनी हे प्रकरण अनैसर्गिक मृत्यू  म्हणून नोंद केली आणि तिचा मृतदेह पोस्टमार्टमसाठी गोवा वैद्यकीय महाविद्यालयात पाठविण्यात आला होता. फॉरेन्सिक विभागातील  दोन डॉक्टरांच्या पथकाने युवतीच्या मृतदेहाचा पोस्टमार्टम केल्यानंतर घक्कादायक सत्य बाहेर आले आहे. तिचे तोंड व नाक दाबून गुदबरून ठार मारल्याचे  अहवालात म्हटले आहे. एवढेच नव्हे तर तिच्यावर लैंगिक  अत्याचार  करण्यात आल्याचे म्हटले आहे. वैद्यकीय भाषेत सेक्स्युअल इंटरकोर्स असे अहवालात म्हटले असले तरी कायद्याच्या भाषेत तिच्यावर बलात्कार करून तिचा गळा आवळून ठार मारण्याचा हा भीषण गुन्हा करण्यात आला आहे. 

वर्षभरापूर्वी याच साल्वादोर द मूंद येथील चिरेखणीत एका युवतीचा मृतदेह सापडला होता. तिच्यावरही बलात्कार करून नंतर ठार करण्यात आल्याचे आढळून आले होते. या प्रकारामुळे या परिसरात भितीचे वातावरण असून पर्वरी पोलिसांनी या प्रकरणात काहीही भाष्य करणे टाळले आहे. हे प्रकरण अनैसर्गिक मृत्यू म्हणून नोंद करण्यात आले होते. परंतु वैद्यकीय अहवालानंतर बलात्कार व खूनाचे प्रकरण म्हणून ते नोंदविले जाण्याची शक्यता आहे.