इंदूरमधील प्रसिद्ध व्यापारी राजा रघुवंशी याच्या हत्याप्रकरणात चकित करणारे तपशील समोर आले आहेत. आधी बेपत्ता समजली जाणारी त्याची पत्नी सोनम हीच या थरारक हत्याकांडाची सूत्रधार निघाली आहे. सुरुवातीला पोलिसांना वाटत होते की, मेघालयमध्ये ट्रिपसाठी गेलेले राजा आणि सोनम दोघेही बेपत्ता झाले आहेत. मात्र, सोमवारी या प्रकरणाला नवे वळण मिळाले, जेव्हा राजा रघुवंशीचा मृतदेह एका खड्ड्यात आढळला.
ड्रोनच्या मदतीने शोधमोहीम राबवण्यात आली आणि जंगलातील खड्ड्यात राजाचा मृतदेह सापडला. पोलीस तपासातून समोर आले की, सोनमने तिचा प्रियकर राज कुशवाहा आणि त्याच्या तीन साथीदारांच्या मदतीने राजा याच्या हत्या केली. ही हत्या सोनमच्या डोळ्यांसमोरच झाली.
खूनाचा कट आणि पुरावे
राजाची हत्या झाल्यानंतर आकाश नावाच्या मारेकऱ्याचे रक्ताने माखलेले जॅकेट घटनास्थळी काही अंतरावर आढळले. सुरुवातीला हे जॅकेट सोनमचे असल्याचा संशय पोलिसांना आला होता. मात्र तपासात स्पष्ट झाले की, हे जॅकेट आकाशचेच असून, तो राजाच्या हत्येत थेट सहभागी होता. हत्येनंतर आकाशने राजाच्या रक्ताने माखलेले ते जॅकेट तिथेच फेकून दिले. त्यावेळी सोनमने तिचे स्वतःचे जॅकेट त्याला घालायला दिले.
राजाला खड्ड्यात फेकून दिल्यानंतर सर्व आरोपींनी वेगवेगळ्या मार्गाने घटनास्थळावरून काढता पाय घेतला. सोनम शिलाँगहून गुवाहाटीमार्गे इंदूरला परतली. तिचा प्रियकर राजने आधीच तिला लपण्यासाठी एक खोली तयार ठेवली होती.
तपासात धक्कादायक निष्कर्ष
मेघालयचे एसपी विवेक सीम यांनी म्हटले की, राजाचा मृतदेह सापडल्यानंतर केवळ सात दिवसांत पोलिसांनी पुरावे गोळा करून सोनमला अटक केली. हत्येच्या दिवशी तिचा सतत प्रियकर राज कुशवाहा आणि मारेकऱ्यांशी संपर्क होता. मात्र, अद्याप तिचा मोबाईल सापडलेला नाही.
सोनमने हत्येसाठी जंगल क्षेत्राची निवड कशी केली, याची चौकशी सुरू असून, तिने गुगलवर निर्जन जागेचा शोध घेतला असावा, असा अंदाज पोलिसांनी व्यक्त केला आहे. पूर्व खासी हिल्स भागात दाट जंगलं असल्याने योजना राबवण्यासाठी ती जागा निवडली गेली.
खुनाचा उद्देश काय?
संपूर्ण प्रकरणात सर्वात धक्कादायक बाब म्हणजे सोनमने केवळ काही दिवसांपूर्वी विवाह केलेल्या पतीची हत्या स्वतःच्या डोळ्यांसमोर करवून घेतली आणि मृतदेहाची विल्हेवाट लावण्यासाठी देखील मदत केली. तिच्या प्रियकराच्या मदतीने तिने गुन्ह्याचा संपूर्ण कट रचला आणि नंतर स्वतः गायब झाली. या प्रकरणात पोलीस तपास सुरू असून आणखी अनेक धक्कादायक बाबी समोर येण्याची शक्यता आहे.