पुणे : समलैंगिक संबंधांना नकार देणार्‍या 24 वर्षाच्या तरुणावर तिघांनी मिळून धारदार शस्त्राने वार केल्याची घटना घडली. पुण्यातील टिळक रस्त्यावरील गिरीजा हॉटेलजवळ रविवारी दुपारी पावणे तीन वाजण्याच्या सुमारास ही घटना घडली आहे. घटनेनंतर, परिसरातील नागरिकांनी युवकावर खुनी हल्ला करणार्‍या तिघांना पकडून पोलिसांच्या ताब्यात दिले आहे.
पोलिसांनी ताब्यात घेतलेल्यांपैकी एकजण अल्पवयीन आहे. ताब्यात घेण्यात आलेले तिघे समलैंगिक असल्याची प्राथमिक माहिती तपासात समोर आली असून त्यांनी जखमीकडे सेक्सची मागणी केली होती. त्यास जखमी युवकाने स्पष्ट नकार दिल्याने त्यांनी हा खुनी हल्ला केल्याची प्राथमिक माहिती पोलिसांच्या तपासात समोर आले आहे. याप्रकरणी पोलिसानी येरवडा येथे राहणाऱ्या 18 वर्षाच्या दोघांना ताब्यात घेतले आहे. दुपारी अडीच वाजण्यापूर्वी आरोपी आणि जखमी हे एका इमारतीच्या खाली गेले होते. तेथे आरोपींनी दिनेशकडे सेक्सची मागणी केली. दिनेशने त्यांना स्पष्ट नकार दिल्याने तिघांनी त्यांच्याजवळ असलेल्या घातक हत्याराने त्याच्यावर खोलवर वार केले. जखमी दिनेशने मोठ-मोठयाने आरडा ओरड सुरू केली. परिसरातील नागरिकांनी इमारतीच्या आजु-बाजुला गर्दी केली. काही युवकांनीही घटनास्थळार धाव घेतली. त्यावेळी त्यांना रक्‍ताच्या थारोळयात पडलेला दिनेश दिसला. नागरिकांनी त्याला तेथुन बाहेर काढले आणि तात्काळ रूग्णवाहिका बोलाविण्यात आली. तसेच घटनेची माहिती पोलिसांना देण्यात आली.
याबाबत माहिती मिळताच, खडक पोलीस ठाण्याचे वरिष्ठ पोलीस निरीक्षक राजेंद्र मोकाशी आणि इतर पोलिस अधिकारी घटनास्थळी पोहोचले. त्यांनी तात्काळ जखमी दिनेशला रूग्णालयात पाठविले. सध्या गंभीर जखमी झालेल्या दिनेशवर शस्त्रक्रिया चालू असल्याची माहिती देण्यात आली असून त्याची प्रकृती सद्यातरी स्थिर असल्याचे सांगण्यात आले आहे. आरोपी हे येरवडा परिसरातील आहेत. आरोपी आणि जखमी झालेला दिनेश हे टिळक रस्त्यावर कशासाठी आले होते, याची माहिती घेण्यात येत आहे.