पुणे : सराईत गुन्हेगाराला पकडण्यासाठी गेलेल्या पोलीस पथकावर जमावाने हल्ला केला. यावेळी पोलिसांनी स्वरक्षणार्थ हवेत गोळीबार केला. ही घटना येरवडा येथील पोतेवस्ती येथे गुरुवारी रात्री साडेनऊ वाजण्याच्या सुमारास घडली. या घटनेत एक पोलीस अधिकारी व कर्मचारी किरकोळ जखमी झाले आहेत.
याबाबत पोलिसांनी दिलेल्या माहितीनुसार, येरवडा येथील कोते वस्ती येथे सर्व धर्म समभाव सोसायटी ही म्हाडाची इमारत आहे. येथील नागरिकांना शक्तीसिंग सुरजसिंग बावरी (वय २२) हा गुन्हेगार व त्याचे साथीदार त्रास देत होते. याबाबत पोलीस नियंत्रण कक्षाला नागरिकाने फोन करुन याची माहिती दिली. त्यानुसार येरवडा पोलीस ठाण्यातील पथक शक्तीसिंगला पकडायला तेथे गेले होते. यावेळी बावरी याने तेथील एका समाजातील लोकांना एकत्र करुन पोलिसांविरुद्ध भडकावले. त्यानंतर शक्तीसिंग याला पकडण्यासाठी गेलेल्या पोलिसांवर हा जमाव चाल करुन आला. या वेळी झालेल्या गोंधळात एक पोलीस अधिकारी व कर्मचारी जखमी झाले. तेव्हा पोलिसांनी हवेत एक राऊंड फायर केला. गोळीबाराचा आवाज ऐकल्यावर जमाव पांगला. त्यानंतर पोलिसांनी शक्तीसिंग याला ताब्यात घेतले आहे. रात्री उशिरापर्यंत येरवडा पोलीस ठाण्यात गुन्हा दाखल करण्याचे काम सुरु होते.