आधी पतीला सोडलं, मग दीराशी लग्न करून दोघांनाही संपवलं; संपत्तीसाठी 'तिने' रचला भयंकर कट

एका महिलेने आधी दोन भावांशी लग्न केलं आणि नंतर संपत्ती हडपण्यासाठी दोघांचीही हत्या घडवून आणली.

बिहारच्या बेगूसराय जिल्ह्यातून एक अशी खळबळजनक घटना समोर आली आहे, ज्याने लग्न, नातेसंबंध आणि विश्वास यांना काळीमा फासला आहे. एका महिलेने आधी दोन भावांशी लग्न केलं आणि नंतर संपत्ती हडपण्यासाठी दोघांचीही हत्या घडवून आणली. या घटनेने सर्वांनाच मोठा धक्का बसला असून परिसरात एकच खळबळ उडाली आहे. 

नातेवाईकांनी दिलेल्या माहितीनुसार, सुनीता देवीचं लग्न २०११ मध्ये किशनगंज जिल्ह्यातील ठाकूरगंज येथील भूषण सिंग याच्याशी झालं होतं. मात्र लग्नानंतर अवघ्या एका महिन्यातच ती भूषण सिंगला सोडून निघून गेली. त्यानंतर तिने स्वतःच्या दीराशी म्हणजेच भूषणचा धाकटा भाऊ राजू सिंग याच्याशी कोर्ट मॅरेज केलं आणि त्याच्यासोबत राहू लागली.

नातेवाईकांचा आरोप आहे की, सुनीता देवीने तिचा दुसरा पती राजू सिंग याच्या हत्येचाही कट रचला होता. सुमारे एक वर्षापूर्वी राजू सिंगवर गोळीबार करण्यात आला होता, मात्र त्या हल्ल्यातून तो वाचला होता. काही काळानंतर जेव्हा ते बरे होऊन घरी परतले, तेव्हा गळा दाबून आणि तोंडावर उशी ठेवून त्यांची हत्या करण्यात आली. त्या वेळी कोणालाही संशय आला नाही आणि हे प्रकरण शांत झालं.

सोमवारी संध्याकाळी भूषण सिंग जनावरांसाठी शेतात चारा आणायला जात होता. त्याच वेळी आधीच दबा धरून बसलेल्या गुन्हेगारांनी त्याच्यावर अंदाधुंद गोळीबार केला. गोळी लागताच भूषण सिंग जमिनीवर कोसळला आणि त्याचा जागीच मृत्यू झाला. या घटनेनंतर परिसरात दहशतीचं वातावरण पसरलं आहे. नातेवाईक अशोक सिंग आणि इतरांनी आरोप केला आहे की, या हत्येमागे भूषणची पहिली पत्नी सुनीता देवीच आहे. जमीन आणि इतर संपत्ती हडपण्यासाठी तिने आधी राजू सिंग आणि आता भूषण सिंगची हत्या घडवून आणल्याचं त्यांचं म्हणणं आहे.

नातेवाईकांच्या मते, अलीकडच्या काळात सुनीता देवीने जमीन विकली होती, ज्यावरून भूषण सिंगशी तिचा वाद सुरू होता. भूषण बाहेर पडताच त्याच्यावर गोळीबार सुरू झाला. यावरून ही हत्या पूर्ण नियोजित कटाचा भाग असल्याचं स्पष्ट होतं. घटनेची माहिती मिळताच मुफस्सिल पोलीस घटनास्थळी दाखल झाले आणि त्यांनी मृतदेह ताब्यात घेऊन तपासणीसाठी रुग्णालयात पाठवला. सध्या पोलीस सर्व बाजूंनी या प्रकरणाचा तपास करत आहेत.