हत्या प्रकरणातील मुख्य आरोपींसोबत बैठक करणारा पोलीस हवालदार निलंबित

Crime Case :बांधकाम व्यावसायिक राजेश कानबार खून प्रकरण

ठळक मुद्दे पोलीस उपायुक्त पंकज देशमुख यांनी हा आदेश दिला आहे. परमेश्वर तुकाराम सोनके असे निलंबीत करण्यात आलेल्या पोलिस हवालदाराचे नाव आहे.

पुणे : जमिनीच्या आर्थिक वादातून बांधकाम व्यावसायिक राजेश कानाबार यांच्यावर गोळीबार करुन त्यांचा खून केल्या प्रकरणातील मुख्य सुत्रधार व इतरांबरोबर हॉटेलमध्ये बैठक घेणाऱ्या चंदननगर पोलीस ठाण्यातील पोलीस हवालदाराला निलंंबित करण्यात आले. पोलीस उपायुक्त पंकज देशमुख यांनी हा आदेश दिला आहे.परमेश्वर तुकाराम सोनके असे निलंबीत करण्यात आलेल्या पोलिस हवालदाराचे नाव आहे. ही घटना जिल्हाधिकारी कार्यालयाजवळील एसबीआयच्या प्रवेशद्वाराजवळ ५ ऑक्टोंबर रोजी दुपारी पावणे तीनच्या सुमारास घडली होती. बावधन ब्रुद्रक येथील येथील जमिनीचा निकाल कानाबार यांच्या बाजूने लागणार असल्याचा अंदाज असल्याने आरोपींना हा गुन्हा केल्याचे फिर्यादीत नमूद करण्यात आला आहे.कानाबार यांच्या खुनासाठी राजेश शामलाल साळुंके (वय ३८, रा. सुखसागरनगर, कात्रज) याने मारेकर्याला पिस्तुल आणि काडतुसे पुरविल्याचे पोलिस तपासात निष्पन्न झाले आहे. तो व त्याचा साथीदार राकेश रमेश बुरटे (वय ३६, रा. जनता वसाहत, पर्वती) खुनाचे मुख्य सुत्रधार असल्याचे तपासात निष्पन्न झाले होते. त्यांच्यासह सनी अशोक वाघमारे (वय २६, रा. वाघोली), रोहित विजय यादव (वय १९, रा. सुखसागर नगर, कात्रज), गणेश ज्ञानेश्वर कुर्ह (वय ३६), राहुल आनंदा कांबळे (वय ३६), रुपेश आनंदा कांबळे (वय ३८), हसमुख जसवंतभाई पटेल (वय ३१) यांच्यावर याप्रकरणी गुन्हा दाखल करण्यात आला होता.राजेश कानाबार यांच्यावर गोळीबार करुन त्यांचा खुन केल्यानंतर गुन्ह्यातील आरोपी राजेश साळुंके, राकेश बुरटे रोहीत यादव यांच्यासोबत पोलिस हवालदार परमेश्वर सोनके हा चंदनगर येथील एका हॉटेलमध्ये बैठकीस रात्री साडेनऊ वाजता बसल्याचे सीसीटिव्हीच्या विश्लेषणावरून निष्पन्न झाले आहे. आरोपी आणि सोनके हे त्या ठिकाणी बसल्याबाबत हॉटेलचालकानेही दुजोरा दिला आहे. सोनके याच्या संपर्कात आरोपी आले असतानाही, त्याने आरोपींना पोलिसांसमोर हजर न करता पोलिसांना कोणतीही माहिती दिली नाही.सोनके याने आरोपींना मदत करण्याच्या हेतूने कृत्य केल्याने, पोलिस दलाची शिस्त मलीन केल्याने, पोलिस शिस्तीस बाधा आणणारे असल्याने आरोपींना मदतकरणारे असल्याने निष्काळजीपणा व बेजबाबदारपणाने गैरवर्तन केल्याप्रकरणी निलंबनाचे आदेश काढले आहेत.