आधी फोटो, व्हिडिओ बनविले; नंतर व्हायरल करण्याची धमकी देत केला अत्याचार, संशयिताला अटक

अल्पवयीन असल्यापासून वेगवेगळ्या ठिकाणी नेऊन केले अश्लील कृत्य

विजयकुमार सैतवाल, लोकमत न्यूज नेटवर्क, जळगाव: सोबतचे फोटो व व्हिडीओ व्हायरल करण्याची धमकी देत विद्यार्थिनीवर अत्याचार करीत तिला वारंवार त्रास देणाऱ्या दानीश तडवी (रा. रामेश्वर कॉलनी जळगाव) या तरुणाविरुद्ध एमआयडीसी पोलिस ठाण्यात गुन्हा दाखल करण्यात आला आहे. त्याला एमआयडीसी पोलिसांनी रामेश्वर कॉलनी परिसरातून अटक केली आहे.

एमआयडीसी पोलिस ठाण्याच्या हद्दीतील एका भागात १८ वर्षीय तरुणी कुटुंबासह राहते. ही तरुणी अल्पवयीन असताना सन २०१९ पासून संशयित दानीश तडवीला ओळखत होती. त्यानंतर ओळखीचा फायदा घेत दानीशने तरुणीला वेगवेगळ्या ठिकाणी नेवून सुरूवातीला अश्लिल कृत्य केले. त्याचे फोटो आणि व्हिडीओदेखील बनविले. त्यानंतर पुन्हा सन २०२२ मेहरुण परिसरात एका ठिकाणी तिला नेऊन फोटो व व्हिडीओ व्हायरल करण्याची धमकी देत तिच्यावर अत्याचार केला. त्यानंतर पुन्हा त्रास देणे सुरूच होते. हा त्रास सहन न झाल्याने पीडीत तरुणीने हा प्रकार नातेवाईकांना सांगितला.

त्यानुसार शनिवार, ७ ऑक्टोबर रोजी तरुणीने एमआयडीसी पोलिस ठाण्यात फिर्याद दिली. त्यावरून पोस्को कायद्यान्वये गुन्हा दाखल करण्यात आला. गुन्हा दाखल होताच पोलिस निरीक्षक जयपाल हिरे यांच्या मार्गदर्शनाखाली पोउनि रुपाली महाजन, पोहेकॉ अल्ताफ पठाण, पोलिस नाईक, योगेश बारी, मुकेश पाटील, सचिन पाटील, चंद्रकांत पाटील, ललित नारखेडे यांनी दानीश तडवी याला रामेश्वर कॉलनी परिसरातून अटक केली.