बिहारमधून एक धक्कादायक घटना समोर आली आहे. भ्रष्टाचाराविरुद्ध मोठी कारवाई करत विशेष दक्षता पथकाने (Special Vigilance Unit) आरोग्य विभागाचे डीजीएम पंकज कुमार यांच्या घरावर छापा टाकण्यात आला आहे. उत्पन्नापेक्षा जास्त मालमत्ता जमा केल्याच्या या प्रकरणात छापेमारी दरम्यान हायव्होल्टेज ड्रामा पाहायला मिळाला. अधिकाऱ्याने पुरावे नष्ट करण्यासाठी घरातील रोख रक्कम आणि दागिने खिडकीतून बाहेर कचऱ्यात फेकून दिले.
दक्षता पथक पंकज कुमार यांच्या निवासस्थानी पोहोचलं, तेव्हा त्यांनी घाईघाईत घरात ठेवलेली रोख रक्कम आणि दागिने खिडकीबाहेर कचऱ्याच्या ढिगाऱ्यात फेकले. मात्र सतर्क अधिकाऱ्यांनी तातडीने तो कचरा शोधला आणि फेकलेली सर्व रक्कम व दागिने जप्त केले. आरोग्य विभागाच्या अंतर्गत येणाऱ्या BMSICL चे डीजीएम (प्रोजेक्ट) पंकज कुमार यांच्या विविध ठिकाणांवर ही छापेमारी करण्यात आली आहे.
११ वर्षांची नोकरी आणि 'अफाट' संपत्ती
पंकज कुमार यांनी सहाय्यक अभियंता म्हणून आपल्या सेवेची सुरुवात केली होती. अवघ्या ११ वर्षांच्या कारकिर्दीत त्यांनी कोट्यवधींची मालमत्ता गोळा केली. प्राथमिक तपासात त्यांच्या उत्पन्नापेक्षा सुमारे १ कोटी रुपये अधिकची मालमत्ता असल्याचं उघड झालं आहे. दक्षता पथकाने पंकज कुमार यांच्या एकूण चार ठिकाणांवर एकाच वेळी धाड टाकली. या छापेमारीत मोठ्या प्रमाणात रोख रकमेव्यतिरिक्त जमिनीची कागदपत्रं आणि विविध गुंतवणुकीशी संबंधित दस्तऐवज जप्त करण्यात आले आहेत.
पंकज कुमार सध्या BMSICL (बिहार मेडिकल सर्व्हिसेस अँड इन्फ्रास्ट्रक्चर कॉर्पोरेशन लिमिटेड) मध्ये डीजीएम पदावर कार्यरत आहेत. हा विभाग आरोग्य व्यवस्थेशी संबंधित बांधकाम कामांची जबाबदारी पाहतो. प्रकल्पांमध्ये फेरफार करून ही संपत्ती जमवण्यात आल्याचा संशय व्यक्त केला जात आहे.
नातेवाईकांच्या नावावरही मालमत्ता
दक्षता पथकाच्या सूत्रांनी दिलेल्य़ा माहितीनुसार, पंकज कुमार यांनी केवळ स्वतःच्याच नव्हे, तर आपल्या नातेवाईकांच्या नावावरही पाटण्यातील महत्त्वाच्या ठिकाणी अनेक मालमत्ता खरेदी केल्या आहेत. सध्या ही कारवाई सुरू असून पथक जप्त केलेल्या कागदपत्रांची छाननी करत आहे. पूर्ण तपासणीनंतरच संपत्तीचा नेमका आकडा स्पष्ट होईल, असं अधिकाऱ्यांनी सांगितलं आहे.
Web Summary : Bihar health official, Pankaj Kumar, raided for disproportionate assets. He threw cash and jewelry from his window. Authorities seized the assets. Kumar amassed crores in 11 years, exceeding income by ₹1 crore. Raids are ongoing at multiple locations; relatives' assets also under scrutiny.
Web Summary : बिहार में स्वास्थ्य अधिकारी पंकज कुमार के घर पर छापा, आय से अधिक संपत्ति का मामला। अधिकारी ने खिड़की से पैसे और गहने फेंके। सतर्कता विभाग ने संपत्ति जब्त की। पंकज कुमार ने 11 वर्षों में करोड़ों की संपत्ति अर्जित की, जो आय से 1 करोड़ रुपये अधिक है। रिश्तेदारों की संपत्ति भी जांच के दायरे में।