सेलू(वर्धा ) : सोळा चाकांचा अवजड ट्रक एका मिनी ट्रकवर आदळून झालेल्या अपघातात एकाचा मृत्यू झाल्याची घटना आज पहाटेच्या सुमारास कान्हापूरजवळ घडली. अक्षय सहारे(वय३५) रा. रुई(वाई) जि. यवतमाळ असे मृतकाचे नाव आहे. सदर अपघातात दोन्ही भरधाव ट्रक रस्त्यावर थेट आडवे झाले असून मिनी ट्रकमधील हजारो कोंबड्यांचाही यात बळी गेला.
प्राप्त माहितीनुसार वर्ध्याहून नागपूरच्या दिशेने सोयाबीन घेऊन जाणारा एम एच ३७ टी १५२१ क्रमांकाचा सोळा चाकांचा ट्रक कोंबड्या घेऊन जाणाऱ्या सिजी ०८ ए ५५४४ क्रमांकाच्या मिनी ट्रकवर मागाहून जोरात आदळला. सदर अपघात आज बुधवारी पहाटे पावणेसहा वाजताच्या सुमारास कान्हापूर नजिक घडला.
या अपघातात मिनी ट्रक हा थेट रस्ता दुभाजकावर आडवा झाला. त्यातील हजारो कोंबड्या या धडकेत मृत्यूमुखी पडल्यात. धडक एवढी भिषण होती की यातील काही कोंबड्या गाडीबाहेर पडून रस्त्यावर विखूरल्या होत्या. तर दुसरीकडे धडक देणारा ट्रक सुद्धा रस्त्यालगतच्या खाईत कोसळला. यातील अक्षय सहारे नामक व्यक्तीचा मृत्यू झाला आहे. अपघातानंतर ग्रामस्थांनी व पोलिसांनी घटनास्थळ गाठून जखमींना सेवाग्राम रुग्णालयात उपचारासाठी दाखल केले.