जळगाव- शहरात २४ तासाच्या अंतरात दोन तरुणांचे खून झाले आहेत. या दोन्ही खुनामागे अनैतिक संबंधाचे कारण उघड झाले आहे. सागर नरेंद्र पवार (वय २८, रा.समता नगर) व नरेश आनंदा सोनवणे (वय २८, रा.राजाराम नगर,दूध फेडरेशनजवळ) असे खून झालेल्या तरुणांची नावे आहेत. अमित नारायण खरे (रा.समता नगर, मुळ रा.कळमसरे, ता.पाचोरा) व आकाश सखाराम सोनवणे (वय २५,रा.कानळदा रोड, जळगाव) असे अटक करण्यात आलेल्या संशयितांची नावे आहेत.
पहिली घटना समता नगरात घडली. सागर याचे अमित खरे याच्या पत्नीशी अनैतिक संबंध होते. पहाटे दोन वाजता सागरच्या घरातच अमितची पत्नी आढळून आली. त्यामुळे संतापाच्या भरात अमितने चाकूने सागरच्या मानेवर वार केले. गंभीर जखमी झालेल्या सागरचा पहाटे साडे पाच वाजता खासगी रुग्णालयात मृत्यू झाला.
दुसऱ्या घटनेत दुपारी दोन वाजता नरेशवर आकाश याने हल्ला केला. आकाश व नरेश या दोघांचे एकाच महिलेशी अनैतिक संबंध होते. नरेश शनिवारी दुपारी तिच्या घरी गेला होता. त्यानंतर थोड्या वेळाने आकाशही तेथे आला. त्यावरुन दोघांमध्ये वाद झाला व आकाशने नरेश याच्या पाठीवर, कमरेवर पोटाजवळ चाकूसारख्या शस्त्राने वार केले. जिल्हा रुग्णालयात दाखल केल्यानंतर दुपारी तीन वाजता नरेशचा मृत्यू झाला. दोन्ही प्रकरणात रामानंद नगर व शहर पोलीस ठाण्यात खुनाचा गुन्हा दाखल झाला आहे.