मुंबई : डॉकयार्ड रोड येथे शनिवारी एका व्यक्तीची हत्या करण्यात आली. या व्यक्तीच्या डोक्यात दगड घालून त्याचा खून करण्यात आल्याचा प्राथमिक अंदाज आहे. त्यानुसार याप्रकरणी भायखळा पोलीस अधिक तपास करत आहेत.
शनिवारी पहाटे डॉकयार्ड रोडच्या गोदरेज केबिन परिसरात ही घटना घडल्याची माहिती पोलिसांनी दिली. वसीम शेख (४०) असे मृताचे नाव आहे. याप्रकरणी पोलिसांनी नुरा नावाच्या व्यक्तीविरुद्ध खुनाचा गुन्हा दाखल केला असून त्याचा शोध सुरू आहे. याप्रकरणी फिर्यादी अब्दुल कादीर अयुब वाघू (३९) यांच्या फिर्यादीवरून पोलिसांनी खुनाचा गुन्हा दाखल केला आहे.
अब्दुल हे त्यांचे मित्र कासिम शेख आणि शाहरुख मोमीन यांच्यासोबत गप्पा मारत बसले होते. त्याचवेळी त्यांना गोदरेज केबिनवर मोठा दगड पडल्याचा आवाज आला. तो ऐकून त्यांनी तिकडे धाव घेतली. ते पोहोचताच एक व्यक्ती धावत बाहेर आली आणि शिडीवर चढून डॉकयार्ड स्टेशनवर गेली.
अब्दुल जेव्हा आत गेले तेव्हा वसीम शेख हे डोक्याला मोठी जखम झाल्याने रक्तबंबाळ अवस्थेत पडल्याचे दिसले. त्यामुळे त्यांनी याप्रकरणी तत्काळ पोलिसांना घटनेची माहिती दिली. त्यानुसार पोलिसांनी घटनास्थळी धाव घेत वसीमला जे. जे. रुग्णालयात नेले. मात्र तेथील डॉक्टरांनी त्यांना मृत घोषित केले.