मुरादाबादमध्ये चार महिन्यांपूर्वी प्रेमविवाह केलेल्या एका तरुणीने तिच्या सासरी आत्महत्या केली. आत्महत्येआधी तिने व्हिडीओ बनवला होता. "माझ्या मृत्यूनंतर माझं काय होईल हे मला माहित नाही, पण ते या जीवनापेक्षा वाईट नक्कीच नसेल. माझी नणंद आणि सासरे मला दररोज म्हणतात की, तू का मरत नाहीस? माझ्या मृत्यूला माझी नणंद आणि सासरे जबाबदार आहेत" असं तरुणीने तिच्या व्हिडीओमध्ये म्हटलं आहे. मुलीच्या वडिलांनी सासरच्या लोकांवर हत्येचा आरोप केला आहे. भोजपूर पोलीस ठाण्याच्या हद्दीतील पीपलसना सुंदरनगर येथे ही घटना घडली.
मुरादाबादमधील मोहल्ला सराई गुलझारीमल येथील रहिवासी सलीम अहमद यांनी पोलिसांना दिलेल्या माहितीनुसार, माझी मुलगी आमरीन हिचा मोहल्ला सुंदरनगर पीपलसाना येथील रहिवासी शाहिदचा मुलगा जुनैद याच्याशी चार महिन्यांपूर्वी प्रेमविवाह झाला होता. जुनैदचे कुटुंब या लग्नासाठी तयार नव्हतं. पण जुनैदने त्याच्या कुटुंबाच्या इच्छेविरुद्ध लग्न केलं होतं. आत्महत्या करण्यापूर्वी मुलीने २ मिनिटे ३७ सेकंदांचा व्हिडीओ बनवला.
"माझ्या मृत्यूसाठी माझे सासरे आणि नणंद जबाबदार"
"माझी तब्येत बिघडल्यापासून आणि मिसकॅरेज झाल्यापासून मला खूप त्रास होत आहे. कधीकधी हे लोक मला जेवायला देत नाहीत. माझ्या मृत्यूसाठी माझे सासरे आणि नणंद जबाबदार आहेत. ते माझ्या पतीला माझ्याविरुद्ध सतत भडकवत राहतात. सर्वजण मला तू मर असं सांगतात, माझा नवरा बंगळुरूमध्ये आहे, माझे सासरे आणि नणंद घरी आहेत आणि त्यांनी माझं जगणं अवघड केलं आहे. माझ्या मृत्यूनंतर माझं काय होईल हे मला माहित नाही पण ते निश्चितच या जीवनापेक्षा वाईट नसेल" असं तरुणीने व्हिडीओमध्ये म्हटलं आणि नंतर गळफास घेऊन आत्महत्या केली.
"माझ्या सासरचे मला मारताहेत, मला वाचवा"
आमरीनचे वडील सलीम यांनी सांगितलं की, २४ मे रोजी दुपारी अडीच वाजता आमरीनने व्हिडीओ कॉल केला. फोन करता करता ती रडू लागली आणि म्हणाली, "अब्बा, माझ्या सासरचे मला मारत आहेत, कृपया मला वाचवा." मुलीला रडताना पाहून सलीम त्यांच्या कुटुंबातील सदस्य समीर, कौशर बेगम आणि मैसर जहाँ यांच्यासह पिपलसाना येथील तिच्या सासरच्या घरी पोहोचले. तिथे आमरीनचा मृतदेह अंगणात एका पलंगावर पडलेला दिसला. गावकऱ्यांनी सांगितलं की मुलीने गळफास घेऊन आत्महत्या केली आहे. "माझ्या मुलीची हत्या झाली आहे. तिच्या सासरच्यांनी तिला खूप छळलं" असंही आमरीनच्या वडिलांनी म्हटलं आहे.