ठळक मुद्देआठवड्याभरापूर्वी मध्य रेल्वेवर सँडहर्ट्स रोड आणि मस्जिद बंदर स्थानकांदरम्यान या विकृताने महिलेचा विनयभंग केला होता. 2017 साली अशरफने 15 वर्षीय तरुणीचा विनयभंग करण्याचा प्रयत्न केला होता.
मुंबई - लोकलच्या डब्यात प्रवास करणाऱ्या महिलांचा विनयभंग करणाऱ्या नराधमाला गजाआड करण्यात आलं आहे. आठवड्याभरापूर्वी मध्य रेल्वेवर सँडहर्ट्स रोड आणि मस्जिद बंदर स्थानकांदरम्यान या विकृताने महिलेचा विनयभंग केला होता. त्यानंतर सीएसएमटी लोहमार्ग पोलिसांनी अशरफ अली करीमुल्ला शेखला बेड्या ठोकल्या.
2017 साली अशरफने 15 वर्षीय तरुणीचा विनयभंग करण्याचा प्रयत्न केला होता.या प्रकरणी त्याला अटक करण्यात आली होती. नंतर तो तुरुंगातून सुटून आला होता. आठवड्याभरपूर्वी सँडहर्ट्स रोड आणि मस्जिद बंदर स्थानकादरम्यान पीडित महिला लोकलने प्रवास करत होती. त्यावेळी लोकलमध्ये महिला डब्यात घुसून अशरफने महिलेचा विनयभंग केला होता. सीसीटीव्हीच्या मदतीने पोलिसांनी आरोपीला अटक केली. त्याच्यावर याआधीही अशाच प्रकारचे गुन्हे नोंद असल्याचं तपासात निष्पन्न झालं आहे.