मुंबई - पुणे येथे एमटी विभागात डीआयजी पदावर असलेले निशिकांत मोरे यांच्यावर अश्लील वर्तन केल्यामुळे 26 डिसेंबर रोजी पॉक्सोअंतर्गत तळोजा पोलीस ठाण्यात गुन्हा दाखल करण्यात आला. त्यानंतर आज मोरे यांचे निलंबन करण्यात आले. संबंधित प्रकरणाला वेगळे वळण लागले असून संबंधित फिर्यादी अल्पवयीन दोन दिवसांपूर्वी तरुणी घरातून बेपत्ता झाली होती. यासंदर्भात तळोजा पोलीस ठाण्यात हरवलेली व्यक्ती अल्पवयीन असून त्याची तक्रार दाखल करण्यात आली आहे. मात्र, आता ही तरुणी उत्तर प्रदेशात असल्याची पोलिसांना सीसीटीव्ही फुटेजद्वारे केलेल्या तपासातून समोर आले आहे. या मुलीला मुंबई सुखरूप आणण्याचे प्रयत्न सुरु असल्याची माहिती पोलीस सूत्रांनी दिली.
गृह विभागाचा मोठा निर्णय; विनयभंगाचा आरोप असणारे डीआयजीचे निलंबन
पोलिसांनी सीसीटीव्ही फुटेजच्या आधारे या प्रकरणी बेपत्ता मुलीचा शोध लावला आहे. तर पीडित तरुणी सीसीटीव्ही फुटेजमध्ये एका मुलासोबत असल्याचे दिसत आहे. 6 जानेवारीला रात्री 11.30 वाजताच्या सुमारास संबंधित तरुणी घरातून निघून गेली. यावेळी या तरुणीने आपल्या बेडरूममध्ये एक नोट ठेवली होती. डीआयजी निशिकांत मोरे यांच्या प्रकरणात मोठ्या प्रमाणात मानसिक धक्का बसला असल्याचे या नोटमध्ये लिहण्यात आले आहे. मला शोधण्याचा प्रयत्न करू नये. माझ्या आत्महत्येला डीआयजी मोरे जबाबदार असतील असे या नोटमध्ये लिहण्यात आले आहे.