मुंबई - मैत्रिणीचे इंस्टाग्राम अकाउंट हॅक करून अश्लील फोटो अपलोड केल्याप्रकरणी एका अल्पवयीन मुलीला मेघवाडी पोलिसांनी अटक झाली आहे. या प्रकरणाची तक्रार दाखल झाल्यानंतर या मुलीला मेघवाडी पोलिसांनी बेड्या ठोकल्या असून तिची कसून चौकशी सुरू आहे. आजवर मुलं अशा प्रकारचे कृत्य करताना पोलिसांच्या जाळ्यात सापडली आहेत. मात्र, एखाद्या अल्पवयीन मुलीने अशा प्रकारचं कृत्य करण्याची ही पहिलीच वेळ आहे.
सप्टेंबर महिन्यात एका मुलीने आपलं इन्स्टाग्राम अकाउंट हॅक झाल्याची तक्रार पोलिसांच्या सायबर सेलला केली होती. अकाउंट हॅक झाल्यानंतर त्याच्यावर अश्लील फोटो शेअर केले जात होते तसेच लोकांना अश्लील मेसेजही पाठवले जात होते. या मुलीची कॉन्टॅक्ट लिस्ट आणि इंस्टाग्राम फॉलोअर्स तपासत असताना पोलिसांना एक आयपी अॅड्रेस सापडला ज्यावरून हे फोटो अपलोड होत होते. या आयपी अॅड्रेसवरून पोलिसांना या अल्पवयीन मुलीला अटक केली. सध्या तिची चौकशी सुरू असून पोलीस या कृत्यामागील कारण जाणून घेण्याचा प्रयत्न करत आहेत.