मुंबई - एका तरुणीने 17 वर्षांच्या मुलाशी लग्न केल्याने तरुणीला अटक झाल्याची अजब घटना घडली आहे. मुलाच्या आईच्या तक्रारीनंतर पोलिसांनी संबंधित तरुणीविरुद्ध पोक्सोअंतर्गत तक्रार दाखल करून तिच्याविरुद्ध कारवाई केली आहे. लग्नानंतरअटक महिला आई बनली असून पाच महिन्यांची एक मुलगी आहे.
गेल्या वर्षी डिसेंबर महिन्यात याबाबत तक्रार नोंदवण्यात आली होती. त्यानंतर तब्बल 11 महिन्यांनंतर या महिलेला अटक करण्यात आली आहे. अल्पवयीन मुलाच्या आईने दिलेल्या तक्रारीनुसार या महिलेने गेल्या वर्षी 8 नोव्हेंबर 2017 रोजी या मुलाशी गपचूप लग्न केलं होतं. 23 नोव्हेंबर 2017 रोजी ही महिला मुलाच्या घरी गेली होती. त्यावेळी तिच्यासोबत तिचे आईवडील आणि भाऊही होता. तिने आपलं या 17 वर्षीय मुलाशी लग्न झाल्याचा दावा केला. मुलाच्या आईवडिलांनी महिलेला विरोध केल्यानंतर महिलेने त्यांच्यासोबत गैरवर्तन केलं आणि जर मुलगा आपल्यासोबत आला नाही तर आत्महत्या करण्याची धमकीही दिली. त्यानंतर मुलगा महिलेच्या घरी जाऊन तिथे राहायला लागला. या महिलेची आणि मुलाची ओळख दोन वर्षांपूर्वी झाली. तेव्हापासून या मुलाचं वागणं बदललं होतं. या महिलेच्या संगतीने आपला मुलगा दहावीत नापास झाला आहे. आरोपी महिलेचे यापूर्वी दोन घटस्फोट झाले आहेत. ही महिला वारंवार आपल्या मुलाला आत्महत्या करण्याची धमकी देत होती आणि दोन वेळा तसा प्रयत्नही तिने केला होता असं देखील तक्रारीत नमूद करण्यात आलं आहे. तसेच आरोपी महिलेने मुलगा म्हणजेच तिचा पती अल्पवयीन नसल्याचे प्रत्यारोप केला आहे. मुलाला एक भाऊ व बहीण आहेत. लग्नाच्यावेळी जर मुलाचं वय 17 वर्ष 8 महिने होतं तर त्याच्या मोठ्या बहिणीचं वय 18 वर्ष कसं असू शकतं, असा सवाल आरोपी महिलेने उपस्थित केला आहे.