मीरारोड - एका महिलेस अश्लील व्हिडीओ व संदेश पाठवणाऱ्या मूळच्या उत्तर प्रदेशच्या २२ वर्षीय तरुणास मनसैनिकांनी चोप देऊन तोंडाला काळे फासले. त्याला लेखी माफी मागायला लावल्याची घटना काशिमीरा पोलीस ठाणे हद्दीत रविवारी घडली आहे.
काशिमीरा प्रभाग १४ मध्ये मनसेचे संपर्क कार्यालय आहे . रविवारी कार्यालयात एक महिला तक्रार घेऊन आली. एक तरुण हा आपणास सतत अश्लील व्हिडीओ व संदेश पाठवत असून त्यामुळे मी मानसिक तणावाखाली आले आणि घाबरले असल्याचे त्या महिलेने सांगितले.
मनसे पदाधिकारी सचिन जांभळे, सचिन साळुंके, रवींद्र शेलार, करण हरिजन, व अविनाश शिरसाठ यांनी त्या तरुणाशी संपर्क साधून त्याला मीरारोडच्या सृष्टी येथील सूर्या शॉपिंग सेंटर जवळून पकडले आणि मनसे कार्यालयात आणले . २२ वर्षाचा सिंग आडनावाचा तो तरुण सोमवारी सकाळी उत्तर प्रदेश येथे मूळ गावी जाण्यास निघणार होता. पण मनसैनिकांनी त्याला पकडून कार्यालयात आणला आणि चोप दिला.
मनसेच्या महिला पदाधिकारी कविता वायगणकर, सुलक्षणा जगताप, दीपा यादव यांनी त्या तरुणाच्या तोंडाला काळे फासून समज दिली . आणि लेखी स्वरूपात त्याच्या कडून चूक झाल्याचे आणि या पुढे त्रास देणार नाही तसेच मनसे प्रमुख राज ठाकरे व समस्त महिला वर्गाची माफी मागत असल्याचे लिहून घेतले . मनसेचे पदाधिकारी सचिन जांभळे यांनी सदरची माहिती दिली .