पुणे : सहकारनगर येथील एका बंगल्यात मुलाचा मृतदेह मिळाला असून त्याची आई गंभीर जखमी अवस्थेत आढळून आली. किमान तीन दिवसांपासून हे दोघेही घरातच पडून असल्याचा पोलिसांचा अंदाज आहे. सहकारनगर भाग दोनमधील शिरीष सोसायटीमधील एका बंगल्यात हा प्रकार घडला आहे. आशिर्वाद सदावर्ते (वय ४२) असे मृतावस्थेत आढळलेल्या तरुणाचे नाव आहे. त्यांची ९० वर्षांची आई बेशुद्धावस्थेत सापडली आहे.
याबाबत पोलिसांनी सांगितले की, सहकारनगर भाग दोनमधील एका बंगल्यातून वास येत असल्याची माहिती शेजाऱ्यांनी सदावर्ते यांच्या बहिणीला कळविली. त्यांनी पुण्यात राहणाऱ्या बहिणीला याची माहिती दिली़ त्यांनी घरी जाऊन पाहिले तर दरवाजा आतून बंद होता. पोलिसांना ही माहिती मिळाल्यानंतर अग्निशामक दलाच्या मदतीने दरवाजा तोडण्यात आला. आत पाहिल्यावर मुलगा चा मृतदेह पलंगावर आढळून आला. तर त्यांची आई बाथरुममध्ये बेशुद्धावस्थेत सापडल्या. त्यांच्यावर खासगी रुग्णालयात उपचार करण्यात येत आहेत. दोन ते तीन दिवस त्यांच्या पोटात अन्नाचा कणही गेला नव्हता. आशिर्वाद सदावर्ते याच्या मृत्युचे कारण समजू शकले नाही. डॉक्टरांनी व्हिसारा राखून ठेवला आहे.
घरात दोघे मायलेक राहत होते. आशिर्वाद यांचा विवाह झाला नव्हता. त्यांना दारुचे व्यसन होते. आशिर्वाद सदावर्ते यांचा दोन ते तीन दिवसांपूर्वी मृत्यू झाला असावा़ त्यांच्या मृतदेहाचे विघटन होण्यास सुरुवात झाल्याचे दिसून येत होते. त्यांच्या आईवर उपचार सुरू असून त्या अजून माहिती देण्याच्या मनस्थितीत नाही असे दत्तवाडी पोलीस ठाण्याचे वरिष्ठ पोलीस निरीक्षक देविदास घेवारे यांनी सांगितले.