Andhra Pradesh Honor Killing: आंध्र प्रदेशातील माचेरला शहरातून माणुसकीला काळिमा फासणारी एक धक्कादायक घटना समोर आली आहे. आपल्या पसंतीच्या तरुणाशी लग्न केले म्हणून एका २२ वर्षीय तरुणीची तिच्याच घरच्यांनी उशीने तोंड दाबून निर्घृण हत्या केली. धक्कादायक बाब म्हणजे, या ऑनर किलिंगच्या गुन्ह्यात एका पोलीस निरीक्षकाने लाच घेऊन पालकांना मदत केल्याचा प्रकार उघडकीस आला आहे.
नेमके प्रकरण काय?
मयत तरुणीचे नाव चौदेश्वरी असून तिचे एका तरुणावर प्रेम होते. मात्र, तिच्या घरच्यांचा या लग्नाला कडाडून विरोध होता. ४ मार्च रोजी चौदेश्वरीने घर सोडले आणि आपल्या प्रियकराशी विवाह केला. यानंतर संतापलेल्या घरच्यांनी ती बेपत्ता असल्याची तक्रार पोलीस ठाण्यात नोंदवली.
पोलीस निरीक्षकाची मदत
माचेरला टाऊनच्या सर्कल इन्स्पेक्टरने १५ मार्च रोजी या जोडप्याचा शोध लावला. नियमानुसार सज्ञान असलेल्या तरुणीला तिच्या इच्छेविरुद्ध घरी पाठवता येत नाही, तरीही संबंधित पोलीस अधिकाऱ्याने चौदेश्वरीला धमकावून जबरदस्तीने तिच्या पालकांकडे सोपवले.
झोपेतच केली हत्या
पालकांच्या घरी परतल्यानंतर अवघ्या तीन दिवसांत, चौदेश्वरीचा संशयास्पद मृत्यू झाला. कुटुंबीयांनी सुरुवातीला तिने आत्महत्या केल्याचा बनाव रचला. मात्र, पोस्टमार्टम रिपोर्टने या खोट्या दाव्याचा पर्दाफाश केला. झोपेत असताना उशीने तोंड दाबून श्वास रोखल्यामुळे चौदेश्वरीचा मृत्यू झाला आहे, असे डॉक्टरांनी अहवालात स्पष्ट केले. हा अहवाल समोर येताच पोलिसांनी तपास चक्रे फिरवून चौदेश्वरीचे वडील चंद्रश्रीनु आणि एका नातेवाईकाला बेड्या ठोकल्या आहेत.
लाच घेऊन पुरावे नष्ट करण्याचा प्रयत्न
या प्रकरणाचा सर्वात धक्कादायक बाब म्हणजे अधिकारी असलेल्या सर्कल इन्स्पेक्टरनेही मदत केली. तपासात समोर आले की, या पोलीस अधिकाऱ्याने तरुणीच्या पालकांकडून मोठी लाच घेऊन या खुनाला आत्महत्येचे रूप देण्याचा प्रयत्न केला. पोलिसांनी आता संबंधित कुटुंबाच्या बँक खात्यांची आणि अलीकडेच काढलेल्या मोठ्या रकमेची चौकशी सुरू केली आहे.
पोलीस महासंचालकांकडून कठोर कारवाई
पोलीस दलाची प्रतिमा मलीन करणाऱ्या या प्रकाराची दखल घेत राज्याच्या पोलीस महासंचालकांनी संबंधित पोलीस अधिकाऱ्याला तत्काळ निलंबित करण्याचे आदेश दिले आहेत. जर या अधिकाऱ्यावरील लाचखोरी, गुन्हेगारी कट रचणे आणि पुरावे नष्ट करण्याचे आरोप सिद्ध झाले, तर त्याच्यावर कडक कायदेशीर कारवाई केली जाणार आहे.
Web Summary : Andhra Pradesh honor killing: Parents murdered their daughter for marrying her lover. A police inspector helped cover it up by taking a bribe and forcing her return home. He's suspended, facing charges.
Web Summary : आंध्र प्रदेश में ऑनर किलिंग: माता-पिता ने प्रेमी से शादी करने पर बेटी की हत्या कर दी। एक पुलिस इंस्पेक्टर ने रिश्वत लेकर और उसे घर लौटने के लिए मजबूर करके मामले को दबाने में मदद की। वह निलंबित, आरोपों का सामना कर रहा है।