कानपूरमध्ये एका व्यावसायिकाच्या पत्नीची हत्या करून तिचा मृतदेह पुरल्याची खळबळजनक घटना समोर आली आहे. जिम ट्रेनरने एकता नावाच्या महिलेची हत्या केली. पोलिसांनी केलेल्या चौकशीत समोर आलं की, जिम ट्रेनर विमल सोनी याचे सोशल मीडियावर खूप फॉलोअर्स आहेत. त्यामुळे त्याच्याकडे अनेक लोक ट्रेनिंगसाठी यायचे. मात्र चार महिन्यांपूर्वी एकता गुप्ता हिची हत्या केल्यानंतर त्याने सर्व सोशल मीडिया अकाउंट बंद केले.
जिम ट्रेनिंग दरम्यान ट्रेनर विमल सोनीने विवाहित असलेल्या एकताला आपल्या जाळ्यात अडकवलं. त्यानंतर दोघांमध्ये जवळीक वाढली. पण पुढे परिस्थिती अशी आली की, विमलने एकताची हत्या केली आणि डीएम बंगल्याजवळ खड्डा खणून तिचा मृतदेह पुरला. मात्र चार महिन्यांनी आता तो पकडला गेला. यावेळी एकताचा सांगाडा सापडला.
अटक केलेल्या जिम ट्रेनर विमलने सांगितलं की, एकता स्वतः माझ्याकडे आली होती. ती स्वतः माझ्याशी लग्न करत नव्हती आणि मलाही लग्न करू देत नव्हती. याच वादामुळे तिला आपल्या मार्गातून हटवलं. २४ जून रोजी ग्रीन पार्क स्टेडियमच्या पार्किंगमध्ये उभ्या असलेल्या कारमध्ये विमल सोनीने एकता गुप्ताची हत्या केल्याची माहिती आहे. त्यानंतर मृतदेह एका खड्ड्यात पुरला.
चार महिने विमल येथून फरार होता. कानपूरचे डीसीपी एसके सिंह यांनी दिलेल्या माहितीनुसार, एकताची हत्या करून फरार झालेला विमल सोनी पंजाबमधील एका हॉटेलमध्ये वेटर म्हणून काम करत होता. त्यानंतर काही काळ तो इकडे तिकडे भटकत राहिला. तो मोबाईलचा वापर करत नव्हता. अखेर त्याचा पर्दाफाश करण्यात पोलिसांना यश आलं आहे. पोलीस या प्रकरणाचा अधिक तपास करत आहेत.