मध्य प्रदेशातील जबलपूरमध्ये एका वृद्ध महिला डॉक्टरसोबत जे काही घडलं, त्याने सर्वांनाच मोठा धक्का बसला आहे. आयुष्यभर लोकांचा जीव वाचवणाऱ्या ८१ वर्षीय डॉक्टर हेमलता श्रीवास्तव यांची त्यांच्याच घरातून अत्यंत दयनीय अवस्थेत सुटका करण्यात आली. आपल्याला जेवण तर लांबच, पण पिण्यासाठी दिवसभरातून फक्त तीन चमचे पाणी दिलं जात होतं असा गंभीर आरोप डॉक्टर हेमलता यांनी केला आहे. त्यांची मौल्यवान मालमत्ता ताब्यात घेण्यासाठी त्यांना भूक-तहानेने व्याकूळ करून मारून टाकण्याचा कट रचला गेल्याची शक्यता वर्तवण्यात येत आहे.
डॉक्टर हेमलता श्रीवास्तव या जबलपूरमधील एक ख्यातनाम महिला डॉक्टर आहेत. त्यांच्या एकुलत्या एक मुलाचा आधीच मृत्यू झाला आहे, तर त्यांच्या पतीचे निधन ६ डिसेंबर रोजी झाले. पतीच्या निधनानंतर त्या जबलपूरमधील 'राइट टाउन' या उच्चभ्रू वस्तीत असलेल्या आपल्या कोट्यवधींच्या घरात एकट्याच राहत होत्या. मिळालेल्या माहितीनुसार, ९ नोव्हेंबर रोजी त्यांनी वैद्यकीय शिक्षणाशी संबंधित एका परिषदेतही सहभाग घेतला होता आणि त्यावेळी त्या पूर्णपणे निरोगी होत्या.
२६ जानेवारी रोजी 'आयएमए' (IMA) जबलपूरच्या अध्यक्षा आणि त्यांच्या ज्युनियर डॉक्टर रिचा शर्मा यांना माहिती मिळाली की, डॉक्टर हेमलता यांची प्रकृती अत्यंत खालावली आहे. याच दरम्यान राजस्थानहून आलेली त्यांची बहीण डॉक्टर कनकलता मिश्रा आणि गायत्री परिवाराशी संबंधित काही लोक त्यांना कोठेतरी नेण्याचा प्रयत्न करत होते. जेव्हा शेजाऱ्यांनी त्यांना रोखलं, तेव्हा त्यांच्यात मोठा वाद झाला. पोलिसांत तक्रार केल्यानंतर रात्री उशिरा त्यांना पुन्हा घरी सोडण्यात आलं.
गंभीर बाब म्हणजे डॉक्टर हेमलता यांची प्रकृती चिंताजनक असतानाही त्यांना रुग्णालयातून डिस्चार्ज देण्यात आला होता. "आता त्या घरीच शांतपणे मृत्यूला कवटाळतील" असं कारण त्यासाठी देण्यात आलं होतं. जेव्हा आयएमएच्या डॉक्टरांनी त्यांना पुन्हा रुग्णालयात दाखल करण्याचा प्रयत्न केला, तेव्हा त्यांनाही विरोध करण्यात आला. आपली बहीण घरीच मरेल, असं डॉक्टर कनकलता यांनी म्हटल्याने हे प्रकरण अधिकच गंभीर बनलं आहे.
तपासातून असंही समोर आलं आहे की, डॉक्टर हेमलता श्रीवास्तव यांच्या मालमत्तेबाबत अनेक 'दानपत्र' आधीच तयार करण्यात आली आहेत. यामध्ये काही नावं शेजारील डॉक्टरांची आहेत, तर काही दानपत्रं गायत्री परिवार ट्रस्टच्या नावावर असल्याचं सांगण्यात येत आहे. आयएमए अध्यक्षा डॉक्टर रिचा शर्मा यांनी प्रशासनाच्या मदतीने डॉक्टर हेमलता यांना जबलपूर मेडिकल कॉलेज रुग्णालयात दाखल केलं आहे, जिथे त्यांच्या प्रकृतीत सुधारणा होण्याची आशा आहे. सध्या पोलीस प्रशासन या संपूर्ण प्रकरणाचा तपास करत आहे.
Web Summary : An elderly doctor in Jabalpur was rescued after being starved and deprived of water, allegedly to seize her wealth. Family and associates are suspected of plotting to hasten her death and steal her assets through fraudulent deeds. Police are investigating.
Web Summary : जबलपुर में एक वृद्ध महिला डॉक्टर को संपत्ति हड़पने के लिए कथित तौर पर भूखा रखा गया और पानी से वंचित रखा गया। परिवार और सहयोगियों पर धोखाधड़ी से संपत्ति हड़पने और उनकी मौत में तेजी लाने की साजिश का संदेह है। पुलिस जांच कर रही है।