कल्याण - ताविज बनवण्याच्या बहाण्याने एका दहा वर्षाच्या निरागस मुलीला घरात बोलवून अश्लील कृत्य करणाऱ्या ८० वर्षाच्या बाबाला खडकपाडा पोलिसांनी अटक केली आहे. युनूस अब्बास सय्यद असे या कथित बाबाचे नाव आहे.
कल्याण डोंबिवलीसह आसपासच्या ग्रामीण भागात कथित बाबांचे पेव फुटले असून चाळींच्या परिसरात या बाबांनी आपले बस्तान मांडले आहे. औषध उपचार, भूत प्रेत बाधा घालविण्याचा या बाबांनी अंधश्रद्धेचा बाजार मांडला असून अशा बाबांवर कारवाई करण्याची मागणी जोर धरू लागली आहे. हे बाबा भोळ्याभाबड्या नागरिकांना विशेषत: लहान मुली, महिला वर्गाला आपले लक्ष्य करत असल्याचे अनेकदा उघड झाले आहे .कल्याण पूर्वेकडील उपचाराच्या बहाण्याने एका पुजाऱ्याने एका महिलेशी लगट करण्याचा प्रयत्न केल्याची घटना ताजी असतानाच कल्याणनजीक असलेल्या मोहोने येथे एका बाबाचे घृणास्पद कृत्य समोर आले आहे. कल्याणनजीक असलेल्या मोहोने अंबिवली प्रगती कॉलनी परिसरात राहणारा कथित बाबा युनूस अब्बास सय्यद याने याच परिसरात राहणाऱ्या दहा वर्षाच्या मुलीला ताविज बनवून देण्याच्या बहाण्याने आपल्या घरात बोलावले. ही मुलगी घरात येताच भामट्या बाबाने तिच्याशी अश्लील चाळे सुरू केले. या घटनेमुळे घाबरलेल्या मुलीने ही घटना आपल्या आईला सांगितली. यानंतर आईने याप्रकरणी खडकपाडा पोलीस स्थानकात धाव घेत तक्रार नोंदवली असून युनूस सय्यद विरोधात गुन्हा दाखल करून त्याला अटक करण्यात आली आहे. पॉक्सो कायद्यान्वये अटक बाबाविरोधात गुन्हा दाखल करण्यात आला आहे.