गुजरातमधील कच्छ जिल्ह्यातील सीमावर्ती भागातून एटीएसने पाकिस्तानसाठी हेरगिरी करणाऱ्या एका व्यक्तीला अटक केली आहे. अटक केलेल्या व्यक्तीचे नाव सहदेव सिंह गोहिल असं आहे. सहदेव आरोग्य कर्मचारी आहे. एटीएसने दिलेल्या माहितीनुसार, आरोपीने भारतीय सीमा, बीएसएफ आणि भारतीय नौदलाच्या कारवाया, परिसराचे फोटो आणि इतर संवेदनशील माहिती पाकिस्तानला पाठवली होती. त्याने गुजरातच्या अनेक सीमावर्ती भागांची माहितीही शेअर केली होती.
चौकशीदरम्यान सहदेव सिंह जून-जुलै २०२३ पासून 'अदिती भारद्वाज' नावाच्या पाकिस्तानी एजंटच्या संपर्कात असल्याचं समोर आलं आहे. दोघांमध्ये व्हॉट्सएपवर संभाषण सुरू होतं. जानेवारी २०२५ मध्ये सहदेव सिंहने त्याच्या आधार कार्डचा वापर करून एक भारतीय सिम कार्ड मिळवलं आणि फेब्रुवारी २०२५ मध्ये त्याने ते सिम कार्ड ओटीपीद्वारे आदिती भारद्वाजला दिलं, ज्याद्वारे व्हॉट्सएप कॉलिंग आणि मेसेजिंग सुरू झालं.
हेरगिरीच्या बदल्यात ४०,००० रुपये
हेरगिरीच्या बदल्यात सहदेव सिंहला ४०,००० रुपयांपर्यंतची रक्कम मिळाली होती. तो पाकिस्तानसाठी कॉन्ट्रॅक्ट बेसवर काम करत होता. त्याचा फोन फॉरेन्सिक सायन्स लॅबोरेटरी (FSL) मध्ये पाठवण्यात आला आहे, जिथे त्याचे चॅटिंग, लोकेशन आणि मीडिया ट्रान्सफरचे विश्लेषण केलं जाईल अशी माहिती मिळत आहे.
हेरगिरी नेटवर्कमध्ये आणखी लोकांचा सहभाग
गुजरात एटीएस या प्रकरणाचा सखोल तपास करत आहे. या हेरगिरी नेटवर्कमध्ये आणखी लोकांचा सहभाग असण्याची शक्यता आहे. सुरक्षा एजन्सी आता कॉल डिटेल्स, आर्थिक व्यवहार आणि डिजिटल उपकरणांची चौकशी करत आहेत.