गुन्हेगारीची राजधानी बनलेल्या उत्तर प्रदेशमध्ये खळबळजनक घटना घडली आहे. ग्रेटर नोएडामध्ये सकाळी मॉर्निंग वॉकला निघालेल्या विद्यार्थिनीची कारमधून आलेल्या काही अज्ञात गुंडांनी छेड काढली. हे तिच्या मोठ्या बहीणीने पाहिले, ती तिला वाचविण्यासाठी गेली असता त्या गुंडांनी मोठ्या बहीणीलाच उचलून नेल्याचा धक्कादायक प्रकार घडला आहे. या घटनेविरोधात पीडितेच्या कुटुंबियांनी महामार्ग अडविला आहे. (Shocking! Went to save the younger sister from molestation; The goons kidnapped the elder sister)
दादरी येथील सादोपूर गावात ही घटना घडली आहे. गुंडांनी पळविलेली तरुणी ही कॉलेजमध्ये शिकते. बीएच्या शेवटच्या वर्षाला आहे. व्हॅनमधून आलेल्या तीन गुंडांनी तिचे अपहरण केले आहे. सादुल्लापुर रेल्वे फाटकाजवळ ही घटना घडली. ही तरुणी तीन छोट्या बहीण, भावासोबत मॉर्निंग वॉकला गेली होती. तेथून परतत असताना एका कारमधून आलेल्या गुंडांनी तिच्या छोट्या बहीणीची छेड काढली. त्यांना जाब विचारायला गेलेल्या मोठ्या बहीणीला या गुंडांनी पळवून नेले. या गुंडांनी आधी छोट्या बहीणीला पळविण्याचा प्रयत्न केला. तिला तिने गुंडांच्या तावडीतून सोडविले. परंतू ती स्वत: या गुंडांच्या तावडीत सापडली.
घटनेनंतर लगेचच पोलिसांना याची खबर देण्यात आली. पोलिसांनी येत अपहृत मुलीचा आणि गुंडांचा शोध सुरु केला आहे. महत्वाचे म्हणजे या मुलींचे वडील हे माजी जिल्हा पंचायत सदस्य आहेत. मोठ्या मुलीचे नाव स्वाती आहे. ती तिची धाकटी बहीण आणि दोन भावांसोबत सकाळी फिरायला गेली होती. स्वातीच्या अपहरणामुळे आजबाजुच्या परिसरात मोठी खळबळ उडाली आहे.