उत्तर प्रदेशातील गोरखपूरमध्ये एका तरुणाने पत्नीची हत्या करून पोलीस स्टेशन गाठलं. "मी पत्नीची हत्या केली आहे. त्यामुळे घरी जा आणि मृतदेह उचला" असं त्याने पोलिसांना सांगितलं. हे ऐकून पोलीस हैराण झाले. पोलीस आणि फॉरेन्सिक टीम घाईघाईने घटनास्थळी पोहोचली तेव्हा आरोपीच्या पत्नीचा मृतदेह खोलीतील बेडवर पडलेला होता. जमिनीवर रक्त होतं.
तरुणाने २ वर्षांपूर्वी घरासमोर राहणाऱ्या एका मुलीशी लव्हमॅरेज केलं होतं. आता दुसऱ्या मुलाशी प्रेमसंबंध असल्याच्या संशयावरून त्याने तिची निर्घृण हत्या केली. हत्या केल्यानंतर तो एक तास मृतदेहाजवळ बसून राहिला. त्यानंतर तो पोलीस स्टेशनमध्ये गेला आणि कबुली दिली. मिळालेल्या माहितीनुसार, अंगद शर्मा असं तरुणाचं नाव आहे. कर्नाटकात सुतार म्हणून काम करतो.
अंगदने दोन वर्षांपूर्वी नेहासोबत लव्हमॅरेज केलं होतं. नेहाचे घर अंगदच्या घरासमोर आहे. कुटुंबाने लग्नाला विरोध केला तेव्हा दोघांनी मंदिरात जाऊन लग्न केलं. लग्नानंतर अंगद त्याची पत्नी नेहासोबत कर्नाटकला गेला. काही दिवसांनी तो गावी परतला. तिथे नेहा एका एजन्सीमध्ये काम करू लागली. दोन महिन्यांपूर्वी अंगद परत आला तेव्हा त्याने त्याची पत्नी मोबाईलवर कोणाशी तरी बोलत असल्याचं पाहिलं.
तू कोणाशी बोलत आहेस? असा प्रश्न विचारला. तेव्हा नेहाने कंपनीच्या प्रोजेक्टबद्दल बोलत असल्याचं सांगितलं. त्यानंतर ते दररोज भांडू लागले. ३ जून रोजी रात्री अंगदचं नेहाशी भांडण झालं. त्यानंतर दोघेही झोपले. सकाळी उठून त्याने नेहावर हल्ला केला. तिचा गळा चिरला. तो मृतदेहाजवळ एक तास बसून राहिला. अखेर त्याने नंतर पोलीस स्टेशन गाठलं.