भुवनेश्वर : जाजपूर जिल्ह्यातील कलिंगनगर पोलीस ठाण्यांतर्गत झुमापाडा गावात रविवारी रात्री एका अल्पवयीन आदिवासी मुलीवर (१५) शाळेत सामूहिक बलात्कार करण्याचा प्रयत्न केल्याप्रकरणी पोलिसांनी सोमवारी पाच जणांना ताब्यात घेतले आहे.
मुलीने नराधमांच्या तावडीतून सुटण्यासाठी शाळेच्या इमारतीच्या छतावरून उडी मारल्याने ती जखमी झाली. कलिंगनगर येथील रुग्णालयात ती मृत्यूशी झुंज देत आहे. पोलिसांनी सांगितले की, केंझार जिल्ह्यातील आनंदपूर येथील तिच्या भावासह ही मुलगी रविवारी संध्याकाळी कलिंगनगर पोलिस ठाण्यांतर्गत डुबुरी चक येथे कालीपानी येथील नातेवाइकांच्या गावी जाण्यासाठी बसची वाट पाहत होती. घटनास्थळाजवळ उपस्थित असलेल्या पाच जणांनी त्यांना बसेसच्या अनुपलब्धतेबद्दल सांगितले आणि डुबुरीजवळील झुमापाडा येथील शाळेत रात्र राहण्याचा सल्ला दिला.
त्यांना शाळेत आश्रय देण्याच्या बहाण्याने त्यांनी अल्पवयीन मुलीवर सामूहिक बलात्कार करण्याचा प्रयत्न केला, त्या मुलीने बलात्काराच्या प्रयत्नाला विरोध करण्यासाठी शाळेच्या छतावरून उडी मारली. त्यांनी तिच्या लहान भावालाही मारहाण केली. पीडितेच्या भावाने मदतीसाठी आरडाओरडा केल्याने स्थानिकांनी घटनास्थळी धाव घेत पोलिसांना माहिती दिली. "आम्ही तात्काळ कारवाई केली आणि पाचही आरोपींना पकडले. पोलिस या प्रकरणाचा तपास करत आहेत," असे कलिंगनगर पोलिस स्टेशनचे प्रभारी निरीक्षक प्रियब्रत राउत यांनी सांगितले.