बंगळुरुतून लग्नासाठी गोव्यात आली, जंगलात सापडला मृतदेह; बसच्या तिकीटावरुन सापडला आरोपी

गोव्यात बंगळुरुतील एका तरुणीचा निर्घृणपणे हत्या करण्यात आल्याचा धक्कादायक प्रकार समोर आला आहे.

Goa Crime: गोव्यातून हादरवणारी बातमी समोर आली आहे. बंगळुरुतून गोव्यात लग्नासाठी आलेल्या एका तरुणीची गळा चिरलेला मृतदेह जंगलात सापडल्याने खळबळ उडाली. पोलिसांनी या प्रकरणाचा २४ तासांच छडा लावत आरोपी प्रियकराला अटक केली. दोघांमध्ये झालेल्या क्षुल्लक वादानंतर प्रियकराने हे धक्कादायक कृत्य केलं. त्यानंतर प्रियकराने तरुणीचा गळा चिरून खून केला. यानंतर तरुणीचा मृतदेह प्रताप नगरच्या जंगलात फेकून दिला आणि नंतर बंगळुरूला पळ काढला.

पोलिसांनी बंगळुरू येथील रहिवासी संजय केविन एम याला तरुणीच्या हत्येच्या आरोपाखाली अटक केली. पोलिसांनी दिलेल्या माहितीनुसार, रोशनी मोशे एम असं या तरुणीचे नाव आहे. ती उत्तर बंगळुरूची रहिवासी होती. दोघेही नुकतेच लग्न करण्याच्या उद्देशाने बंगळुरूहून गोव्यात आले होते. मात्र दोघांमध्ये कशावरून तरी वाद झाला. त्यानंतर संजयने रोशनीचा गळा चिरून खून केला आणि मृतदेह जंगलात फेकून देऊन बंगळुरूला पळ काढला.

पावसामुळे तिथले पुरावे नष्ट झाले होते. त्यामुळे मृताची ओळख पटणे कठीण झाले होते. पोलिसांना तिथे एका पर्समध्ये कर्नाटक बस तिकीट मिळाले. त्या तिकिटाच्या आधारेच पोलिसांनी तपास सुरू केला आणि तरुणीची ओळख पटवली. पोलिसांना हत्येच्या ठिकाणी हुबळी ते गोव्याच्या तिकिटाचा तुकडा मिळाला. त्यानंतर पोलिसांनी बस स्टँडवर सीसीटीव्हीची तपासणी केली तेव्हा रोशनी आणि संजय दिसून आले.

रोशनीची हत्या केल्यानंतर संजय हुबळीला पळून गेला होता. गोवा पोलिसांनी कर्नाटक पोलिसांना संजयविषयी माहिती दिली. त्यानंतर मोबाईल लोकेशनच्या आधारे पोलिसांनी सापळा रचून त्याला ताब्यात घेतले. संजय आणि रोशिनी या दोघांनी काही दिवसांपूर्वी गोव्याला येण्याचा बेत केला होता. त्यानुसार ते गोव्यात फिरत होते. परतीच्या प्रवासात दोघांमध्ये किरकोळ वाद झाल्याचे संजयने रागाच्या भरात प्रतापनगर-धारबांदोडा येथील गर्द झाडीत नेऊन रोशिनी हिचा गळा चिरला. 

संजय यांची रोशिनी यांचे पाच वर्षांपासून प्रेमसंबंध होते. काही दिवसांपूर्वीच रोशिनी हिला नोकरी लागली होती. तर संजय बेरोजगार आहे. दोघांनीही गोव्याला येण्याचे ठरवले, त्यानुसार ते आले. रोशिनीला नोकरी लागल्यापासून संजयला तिच्यावर संशय होता. आपल्याला नोकरी नसल्यामुळे रोशिनी आपल्याला सोडून जाईल, अशी भीती त्याच्या मनात होती. गोव्यात आल्यानंतर यावरुन त्या दोघांत वाद झाल्याची माहिती पोलिसांनी दिली. 'ती माझी नाही तर कोणाचीच नाही', भावनेतूनच तिचा खून केल्याचा संशय पोलिसांनी व्यक्त केला.