- अझहर शेख
नाशिक : शहरातील कार डेकोर व्यावसायिक निखिल दर्यानी ऊर्फ निकू यांचे मागील आठवड्यात दोघांनी त्यांच्या कारमध्ये बसून डोक्याला बंदूक लावून अपहरण केले होते. १ कोटीची खंडणी मागून ५० लाखांची तडजोड करत त्यापैकी १५ लाख रुपये घेतले होते. नाशिकच्या गुन्हे शाखा युनिट-१च्या पथकाने याप्रकरणी सखोल तपास करत तांत्रिक विश्लेषणाच्या मदतीने चौघांना बेड्या ठोकल्या. त्यांच्याकडून २ लाख ८८ हजार रुपयांची रोकड हस्तगत करण्यात आली आहे. टोळीचा म्होरक्या सराईत गुन्हेगार फरार असून, पोलिस शोध घेत आहेत.
शहरातील एका सिग्नलवर दर्यानी यांनी कार उभी केली असता कारजवळ दोघे अनोळखी इसमांनी येऊन चर्चा करायची आहे, असे सांगून एका कारमध्ये बसले. त्यांनी त्यांच्या डोक्याला बंदूक लावून जीवे ठार मारण्याची धमकी देत कार शहराबाहेर घेऊन जाण्यास भाग पाडल्याची घटना शुक्रवारी (दि. ४) भरदुपारी घडली होती. नाशिकरोड, देवळाली कॅम्प, भगूरमार्गे घोटीवरून भंडारदरारोड आदी भागात त्यांना घेऊन जात जीवे ठार मारण्याची धमकी देत हवेत बंदुकीतून दोन राउंड फायर केले होते. यावेळी शहरात त्यांनी त्यांच्या मोबाइलवरून दर्यानी यांच्या भावाशी संपर्क करून ५० लाखांपैकी १५ लाख रुपये देण्यास सांगितले. ही रक्कम घेतल्यानंतर संशयितांनी त्यांना पुन्हा शहराच्या वेशीवर पांडवलेणी येथे आणले. तेथे कार बदलण्याचा प्रयत्नात असताना दर्यानी यांनी कशीबशी सुटका करत पळ काढला होता.
याप्रकरणी पोलिस आयुक्त संदीप कर्णिक, गुन्हे शाखेचे उपायुक्त प्रशांत बच्छाव, सहायक आयुक्त संदीप मिटके यांनी गुन्हे शाखेच्या पथकाला तपासाच्या सूचना केल्या. पोलिस निरीक्षक मधुकर कड, सहायक निरीक्षक हिरामण भोये, उपनिरीक्षक चेतन श्रीवंत, सुदाम सांगळे आदींच्या पथकाने संशयित आरोपी सराईत गुन्हेगार मोहम्मद अन्वर सय्यद (३०, रा. जुने नाशिक), सादिक लतीफ सय्यद (३९, लेखानगर) दर्यानी यांच्या दुकानातील कामगार संशयित अल्फरान अश्पाक शेख (२५, रा. जुने नाशिक), अहमद रहिम शेख (२५, रा. वडाळागाव) यांना अटक केली. त्यांनी गुन्ह्याची कबुली दिली आहे.